ءبىر بالانى مەكتەپكە دايىنداۋ ءۇشىن قانشا قارجى كەرەك

الماتى. قازاقپارات - جاڭا وقۋ جىلى باستالاتىن كۇن جاقىنداعان سايىن دايىندىق تا قىزا ءتۇستى. قاجەتتى كيىم-كەشەك پەن وقۋ قۇرالدارىن قاي جەردەن ساتىپ الامىن دەسەڭىز دە تاڭداۋ وزىڭىزدە.

ال، ءبىر بالا مەكتەپكە دايىن بولىپ بارۋ ءۇشىن قانشا قارجى قاجەت؟ بۇل ساۋلدىڭ جاۋابىن تابۋ ءۇشىن قازاقپارات ءتىلشىسى حالىق ەڭ كوپ باراتىن مەكتەپ جارمەڭكەسىنە، بازار مەن ءىرى ساۋدا دۇكەندەرىنە بارىپ، باعالارىن ءبىلىپ قايتتى.

سونىمەن، الماتىنىڭ «كوك بازارىنداعى» وقۋ-قۇرالدارى مەن مەكتەپ فورماسىنىڭ قۇنىنا توقتالساق.

قىز بالاعا ارنالعان اق كوفتانىڭ ارزانى 6000 تەڭگەگە باعالانسا، ساپاسى جاقسىراعى 10 مىڭ تەڭگەدەن جوعارى. بەلدەمشە - 7000 تەڭگە، كەۋدەشە - 8500 تەڭگە، شاشقا تاعاتىن اق بانتيكتىڭ ەكى داناسى - 2000 تەڭگە، تۋفلي - 15000 تەڭگە، سپورتتىق اياق كيىم - 12500 تەڭگە، اق فۋتبولكا - 3000 تەڭگە، سپورتتىق شالبار - 6000 تەڭگە (دەنە شىنىقتىرۋ ساباعىنا)، اق كولگوتكي - 3500 تەڭگەدەن ساتىلىپ جاتىر. ورتاشا باعادا العان كۇنىڭ وزىندە ءبىر بالاعا كەم دەگەندە 68 مىڭ تەڭگە قاجەت. ۇل بالانىڭ كيىمى ءسال ارزانعا تۇسەدى.

بۇل - بازارداعى باعا. ال ەندى كەيبىر كيىم دۇكەندەرىمەن سالىستىراتىن بولساق، مەكتەپ فورماسى اناعۇرلىم قىمباتقا شىعادى. ماسەلەن، ول جەرلەردە اق كويلەك 16000 تەڭگەدەن، بەلدەمشە ولشەمىنە قاراي 14-18 مىڭ تەڭگە ارالىعىندا، پيدجاك - 23000-25000 تەڭگە، شالبار 15 مىڭ تەڭگەدەن جوعارى، ۇلدارعا ارنالعان كوستيۋم- شالبار (باستاۋىش سىنىپ) 32-35 مىڭ تەڭگە. ءتۋفليدىڭ باعاسىنا كەلەر بولساق، قىزدارعا 27000 نان، ۇلدارعا 19000 تەڭگەدەن ساتىلىپ جاتىر.

بالالارعا قاجەت كيىم-كەشەكتەن بولەك، وقۋ قۇرالدارىنىڭ باعالارىن انىقتادىق. 12 بەتتىك داپتەر - 20-35 تەڭگە، كۇندەلىك - 1000 تەڭگە، جەلىم - 350 تەڭگە، وشىرگىش - 260 تەڭگە، ۇشتاعىش - 200-400 تەڭگە، قارىنداش - 50-150 تەڭگە، قالام - 165 -1035 تەڭگە، ءتۇرلى-ءتۇستى قارىنداش 800-1500 تەڭگە، سىزعىش – 150 دەن، سۋرەت داپتەر - 1000 تەڭگە، پەنال 800-4500 تەڭگە، داپتەر مەن كىتاپ قاپتارىنىڭ 10 داناسى - كەم دەگەندە 1500 تەڭگە، ريۋكزاك - 5500 تەڭگەدەن باستالادى.

اتا-انالاردىڭ ايتۋىنشا، ءار جەردە ۇيىمداستىرىلىپ جاتقان مەكتەپ جارمەڭكەلەرىندەگى تاۋارلاردىڭ باعاسى ارزان بولعانىمەن، ساپاسى وتە تومەن. سوندىقتان، كوپشىلىك قالتاسى كوتەرەتىن، ساپاسى ورتاشا تاۋاردى الۋعا تىرىسادى.

ال، ساۋداگەرلەر بىلتىرعىمەن سالىستىرعاندا وقۋ قۇرالدارىنىڭ قۇنى 30 پايىزعا، مەكتەپ فورماسى 40-45 پايىزعا دەيىن كوتەرىلگەندىگىن ايتتى.