اباي كۇنىنە ارنالعان ديماش چەللەندجى: كىمدەر قولداۋ كورسەتىپ جاتىر

استانا. قازاقپارات - قازاقستان ازاماتتارى تانىمال ءانشى ديماش قۇدايبەرگەننىڭ «اباي كۇنىنە» وراي باستاعان چەللەندجىن قولداپ، الەۋمەتتىك جەلىدە ۇلى اقىننىڭ ولەڭدەرىن وقىعان بەينەجازبالارىن جاريالاپ جاتىر، دەپ حابارلايدى قازاقپارات ءتىلشىسى.

«اباي كۇنى» قارساڭىندا ديماش قۇدايبەرگەن باستاعان چەللەندجدى قابىلداپ، بارلىق دوستارىما، ارىپتەستەرىمە، مادەنيەت، ونەر جانە رۋحانيات سالاسىنىڭ جاناشىرلارىنا جولدايمىن. چەللەندجگە قاتىسۋ ءۇشىن اباي قۇنانباي ۇلىنىڭ كەز-كەلگەن شىعارماسىنان ءۇزىندى وقىپ، #abaychallange حەشتەگىمەن جەلىدە جاريالاۋعا بولادى»، - دەپ جازدى مادەنيەت جانە سپورت ءمينيسترى اسحات ورالوۆ Facebook پاراقشاسىندا.

مادەنيەت ءمينيسترى اباي قۇنانباي ۇلىنىڭ «اسەمپاز بولما ارنەگە» دەپ اتالاتىن ولەڭىن وقىدى.

«ارمىسىزدار قۇرمەتتى قازاقستاندىقتار! ەلىمىزدىڭ ەڭبەك سىڭىرگەن قايراتكەرى ديماش قۇدايبەرگەن Dimash Kudaibergen حاكىم اباي قۇنانبايەۆتىڭ مەرەيتويىنا وراي #اbaychallenge چەللەندجىن باستاعان. وسىعان وراي، ۇلى اباي اتامىزدىڭ كەيىنگى ۇرپاققا قالدىرعان ماڭگىلىك مۇراسىنان ءۇزىندى تارتۋ ەتەمىن»، - دەگەن پرەزيدەنت ءىس باسقارماسى مەديتسينا ورتالىعىنىڭ باسشىسى الەكسەي سويدا ابايدىڭ «اسەمپاز بولما ارنەگە» ولەڭىنىڭ 6 شۋماعىن جاتقان وقىپ بەردى.

ال، كوكشەتاۋ قالاسىنداعى جوعارى مەديتسينا مەكتەبىندە ءبىلىم الىپ جاتقان پاكىستاندىق ستۋدەنت Faiz Ali «كوزىمنىڭ قاراسى» ءانىن ناقىشىنا كەلتىرە ورىندادى.

قوستاناي وبلىستىق پوليتسيا دەپارتامەنتىنىڭ پوليتسەيلەرى دە چەللەندجىگە ءۇن قوسىپ، «Kostanay plaza» ساۋدا ويىن-ساۋىق ورتالىعىندا ابايدىڭ «جەلسىز تۇندە جارىق اي» ءانىن شىرقادى.

ديماشتىڭ چەللەندجىنە مەملەكەتتىك قىزمەتشىلەر، قاراپايىم ازاماتتار، مەكتەپ وقۋشىلارى، ۇستازدار قاۋىمى كەڭىنەن قولداۋ كورسەتىپ جاتىر.