سەمەي قالاسىندا اباي ەسكەرتكىشىنە گۇل شوقتارىن قويۋ ءراسىمى ءوتتى - فوتو

سەمەي. قازاقپارات - عالىمدار، قوعام قايراتكەرلەرى، زيالى قاۋىم، دەپۋتاتتار، جاستار بۇگىن ۇلى جازۋشى، اقىن، اعارتۋشى اباي قۇنانبايەۆتىڭ ەسكەرتكىشىنە گۇل شوقتارىن قويدى، دەپ حابارلايدى قازاقپارات اباي وبلىسىنىڭ اكىمدىگىنە سىلتەمە جاساپ.

سالتاناتتى شاراعا قاتىسقان اباي وبلىسىنىڭ اكىمى نۇرلان ۇرانحايەۆ بۇل شارا ۇلى تۇلعاعا تاعزىم ەتۋ عانا ەمەس، ەل تاريحىندا باعا جەتپەس مۇرا قالدىرىپ، وشپەس ءىز قالدىرعان اقىننىڭ ءومىرى مەن شىعارماشىلىعىن ناسيحاتتاۋعا دا قۇرمەت كورسەتىلىپ وتىرعانىن اتاپ ءوتتى.

«زامانالار اۋىسىپ، دۇنيە ديدارى، كۇندە وزگەرسە دە، حالقىمىزدىڭ ابايعا دەگەن، قۇرمەت سەزىمى، ەش كەمىمەيدى! ۇكىمەتتىڭ قاۋلىسىمەن بەلگىلەنگەن وسى كۇن دە - سونىڭ ايعاعى. اقىننىڭ مول مۇراسى - باعا جەتپەس، رۋحاني اسىل قازىنامىز بولىپ قالا بەرەدى. قالىڭ ەلىن، قايران جۇرتىن «جەتى قاراڭعى تۇندە» اداستىرماي، «بەس دۇشپاننان» بوي سۋىتىپ، «بەس اسىل ىسكە» اسىقتىرعان ۇلى اباي تۋعان حالقىمەن ماڭگى جاسايدى! سەبەبى، وسىناۋ الماعايىپ زاماندا، سۇيەنەرىمىز دە، تابىنارىمىز دا - اباي!» - دەدى وبلىس باسشىسى نۇرلان ۇرانحايەۆ.

مەرەكەگە وراي، 8 تامىزدان باستاپ اباي وبلىسىنىڭ بارلىق قالا مەن اۋداندارىندا 50 دەن استام مادەني-تانىمدىق ءىس-شارالار وتكىزىلىپ جاتىر.

ەستەرىڭىزگە سالساق، 2020 -جىلى 10-تامىز قازاقستاندا «اباي كۇنى» بولىپ بەلگىلەندى.