كوپبالالى انا مەملەكەت باسشىسىنان شىعارماشىلىق ءۇيىن سالىپ بەرۋدى ءوتىندى
اقوردانىڭ ءباسپاسوز قىزمەتىنەن ءمالىم ەتكەندەي، قالا تۇرعىندارى ۇيلەرىن جىلۋمەن قامتاماسىز ەتۋدىڭ ءمان- جايى تۋرالى ايتتى.
مەملەكەت باسشىسى قيىن- قىستاۋ جاعدايدا شىدامدىلىق تانىتقانى جانە اپات سالدارىن جويۋ كەزىندە ازاماتتىق بەلسەندىلىك كورسەتكەنى ءۇشىن ەكىباستۇزدىقتارعا العىس ءبىلدىردى.
«ەكىباستۇزعا احۋالدى كورۋ ءۇشىن ارنايى كەلىپ وتىرمىن. وتكەن قىس وڭاي بولعان جوق. ءبارىن كوردىم، تۇسىنەمىن. دەگەنمەن ءبارىمىز ءبىر ۇلت، ءبىر ەل رەتىندە اۋىزبىرشىلىك تانىتۋىمىز كەرەك. قالا تۇرعىندارى وسى قيىن جاعدايدا سابىرلىق تانىتىپ، شىدادى. ازاماتتىق پوزيتسياسىن، كوزقاراسىن ءبىلدىردى. سوندىقتان بارشاڭىزعا ريزاشىلىعىمدى بىلدىرەمىن. ۇكىمەتكە ءتيىستى تاپسىرمالار بەرىلدى. ءتيىستى قاراجات ءبولىندى. سوندىقتان ءبارى ويداعىداي بولادى دەپ ويلايمىن»، - دەدى پرەزيدەنت.
قاسىم- جومارت توقايەۆ بىلتىرعى توتەنشە جاعداي قايتالانباۋى ءۇشىن ۇكىمەت تاراپىنان بارلىق قاجەتتى شارالار قابىلدانىپ جاتقانىن مالىمدەدى.
سونىمەن قاتار تۇرعىندار مەملەكەت تاراپىنان كورسەتىلىپ جاتقان قولداۋ ءۇشىن العىس ايتىپ، پرەزيدەنتتەن قالانى اباتتاندىرۋ جانە الەۋمەتتىك نىساندار سالۋ ماسەلەسىن كوتەردى. اتاپ ايتقاندا، ەكىباستۇز قالالىق ارداگەرلەر كەڭەسىنىڭ ءتوراعاسى سامات رامازانوۆ «شاحتەر» ساياباعىنا كۇردەلى جوندەۋ جۇرگىزۋ قاجەت ەكەنىن ايتتى. ال كوپبالالى انا ايانا سماعۇلوۆا قالادا بالالاردىڭ بوس ۋاقىتىن ءتيىمدى وتكىزىپ، ولاردىڭ جان- جاقتى دامۋىنا ارنالعان شىعارماشىلىق ءۇيىن سالىپ بەرۋدى سۇرادى.
مەملەكەت باسشىسى تۇرعىنداردىڭ وتىنىشتەرىن نازارعا الىپ، ءتيىستى تاپسىرما بەرەتىنىن جەتكىزدى.
«دۇرىس ايتاسىز. نازارعا الامىز. قىسقا ۋاقىت ىشىندە شىعارماشىلىق سارايىن سالامىز. جالپى، بىزگە ەل كولەمىندە وسكەلەڭ ۇرپاققا قىزمەت ەتەتىن نىسانداردى كوبىرەك سالۋ كەرەك. سپورتپەن اينالىسۋ كەرەك ەكەنىن ايتىپ ءجۇرمىن عوي. بالالالاردى سپورتقا باۋلۋ كەرەك. ءبىراق ول ءۇشىن لايىقتى سپورت الاڭدارى، ستاديوندار قاجەت. ءتىپتى، ونداي سپورت نىساندارى ەلوردادا دا جەتىسپەيدى. سوندىقتان اكىمدەر بۇل ماسەلەمەن مىندەتتى تۇردە اينالىسۋى كەرەك»، - دەدى قاسىم- جومارت توقايەۆ.
ەسكە سالايىق، بۇگىن پرەزيدەنت ق. توقايەۆ جۇمىس ساپارىمەن پاۆلودار وبلىسىنا باردى.
مەملەكەت باسشىسى ەكىباستۇزداعى جىلۋ ەلەكتر ورتالىعىندا جۇرگىزىلىپ جاتقان جوندەۋ جۇمىستارىمەن تانىستى.
پرەمەر- ءمينيستردىڭ ءبىرىنشى ورىنباسارى رومان سكليار ەكىباستۇز قالاسىنداعى جىلۋمەن قامتۋ جۇيەسىن جاڭعىرتۋعا ۇكىمەت تاراپىنان كورسەتىلگەن قولداۋ شارالارى تۋرالى باياندادى.
ەسكە سالساق، بىلتىر 27- قاراشادا ەكىباستۇز جەو- دا بىرنەشە قازاندىق ىستەن شىعىپ، قالا جىلۋسىز قالعان ەدى.