س ق و-دا ەكى ادامنىڭ دەنەسى مەن اربادا جاتقان نارەستە وقيعاسى: ادامداردى قاققان جۇرگىزۋشى ۇستالدى

پەتروپاۆل. قازاقپارات - سوت كۇدىكتىنى ەكى ايعا قاماۋعا الۋعا سانكسيا بەردى، دەپ حابارلايدى قازاقپارات س ق و پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«8-تامىز كۇنى 39 جاستاعى پەتروپاۆل تۇرعىنىن ەكى ايعا قاماۋعا الۋ جونىندە سانكسيا بەردى»، - دەپ حابارلادى ۆەدومستۆونىڭ باسپا ءسوز قىزمەتى.

ايتا كەتەيىك، وسىعان دەيىن 5-تامىز كۇنى ساعات 23:40-تا س ق و-نىڭ ماعجان جۇمابايەۆ اۋداندىق پوليتسيا ءبولىمىنىڭ كەزەكشى بولىمىنە قاراقوعا مەن نادەجكا اۋىلدارىنىڭ اراسىنداعى جولدىڭ شەتىندە قيمىلسىز ەكى ادامنىڭ جاتقانى تۋرالى حابارلاما تۇسكەنىن جازعان ەدىك.

وقيعا ورنىنان پوليتسيا قىزمەتكەرلەرى وسى اۋداننىڭ 38 جانە 35 جاستاعى تۇرعىندارىن، ەر ادام مەن ايەل ادامنىڭ دەنەسىن تاپقان. سونداي-اق وقيعا ورنىنا جاقىن جەردە بالالارعا ارنالعان قولاربادا جاتقان كىشكەنتاي بالا تابىلدى. ول جەدەل جاردەم كولىگىمەن ورتالىق اۋداندىق اۋرۋحاناعا جەتكىزىلدى.

اۆتوكولىكتىڭ جۇرگىزۋشىسى،(كولىكتىڭ يەسى) پەتروپاۆل قالاسىنىڭ 39 جاستاعى تۇرعىنى ۇستالدى. جاۋاپ الا كەلە ەر ادام ەكى جاياۋ جۇرگىنشىنى قاعىپ كەتكەنىن جانە وقيعا ورنىنان كەتىپ قالعانىن ايتتى. جۇرگىزىلگەن مەديتسينالىق كۋالاندىرۋ Toyota Land Cruiser جۇرگىزۋشىسىنىڭ الكوگولدىك ماساڭ كۇيدە ەكەنىن كورسەتتى.