اباي وبلىسىندا ايتىس ورتالىعى سالىنباق

سەمەي. قازاقپارات - اباي وبلىسىندا ايتىس ورتالىعى سالىنادى. بۇل تۋرالى ءوڭىر اكىمى نۇرلان ۇرانحايەۆ ايتىسكەر اقىنداردى قابىلداۋ كەزىندە ايتتى، دەپ حابارلايدى قازاقپارات.

15-17-تامىز ارالىعىندا الماتى قالاسىندا «حابار» تەلەارناسىنىڭ ەفيرىندە «اسىل دومبىرا» تەلەۆيزيالىق جوباسى وتەدى. سايىسقا اباي وبلىسىنىڭ اتىنان ءبىر توپ اقىن قاتىسادى. وسى ورايدا، بۇگىن وبلىس باسشىسى نۇرلان ۇرانحايەۆ ايتىسكەر اقىنداردى قابىلدادى.

جيىن بارىسىندا ءوڭىر اكىمى سەمەي قالاسىندا ايتىس ورتالىعىن سالۋ ماسەلەسى كەشەندى جوسپارعا ەنگىزىلگەنىن، بۇل باعىتتاعى جۇمىستار جالعاسىن تاباتىنىن جەتكىزدى.

ن. ۇرانحايەۆ سايىسقا قاتىسۋشى اقىندارعا ساتتىلىك تىلەپ، «تۇعىرى بيىك تارباعاتاي» ونەر جانە سپورت فەستيۆالىنىڭ «اسىل دومبىرا - 2023» سايىسىندا توپ جارعان ايتىسكەر اقىن ايبەك جەڭىسقازيندى جەڭىسىمەن قۇتتىقتادى.

اباي ءوڭىرىن ايتىس ونەرىنىڭ التىن بەسىگى دەۋگە بولادى. بۇل ولكەدەن نەبىر اقىندار شىققان. بۇگىنگى كۇنى ايتىس ۇلتتىق قۇندىلىققا اينالىپ وتىر.

«قۇرمەتتى اقىندار، ءبىزدىڭ ءوڭىرىمىزدى ايتىس ونەرىنىڭ التىن بەسىگى دەۋگە بولادى. ۇلتتىق ونەردى قاي زاماندا بولماسىن ولتىرمەگەن، كەرىسىنشە جاڭاشا دامۋىنا سەرپىن بەرگەن اقىندار كوپتەپ شىققان. بۇگىنگى بەتكەۇستار اقىندارىمىز، وبلىسىمىزدىڭ نامىسىن قورعاپ جۇرگەن - وزدەرىڭىز. «حابار» تەلەارناسىنىڭ ەفيرىنەن كورسەتىلەتىن «اسىل دومبىرا» تەلەۆيزيالىق جوباسىنا اباي وبلىسىنان قاتىساتىن سىزدەرگە ساتتىلىك تىلەيمىن! جەڭىسپەن ورالىڭىزدار!»، - دەدى وبلىس اكىمى نۇرلان ۇرانحايەۆ.