اقتوبەدە ءبىر سىنىپتىڭ بارلىق تۇلەگى ءبىلىم گرانتىنا يە بولدى

اقتوبە. قازاقپارات - اقتوبە قالاسى قانىش ساتبايەۆ اتىنداعى ورتا مەكتەپ-ليتسەيىنىڭ ءبىر سىنىبىندا وقىعان تۇلەكتەردىڭ بارلىعى مەملەكەتتىك گرانت يەگەرى اتاندى.

ەندى 17 تۇلەك ەلىمىزدىڭ ءار وڭىرىندەگى جوعارى وقۋ ورىندارىندا ءبىلىم الادى، دەپ حابارلايدى قازاقپارات ءتىلشىسى.

اقتوبە قالاسى قانىش ساتبايەۆ اتىنداعى مەكتەپ-ليتسەيىن بيىل بارلىعى 51 تۇلەك ءتامامدادى. ولاردىڭ ءبارى ۇبت تاپسىرىپ، 34 ى مەملەكەتتىك ءبىلىم گرانتىن يەلەندى. اسىرەسە ءبىر سىنىپتا وقىعان 17 تۇلەك جوعارى وقۋ ورنىن تەگىن وقۋعا مۇمكىندىك الدى.

«جىل وتكەن سايىن مەكتەپ تۇلەكتەرىنىڭ كورسەتكىشى ارتىپ كەلەدى. مۇندا وقۋشىلاردىڭ نەمەسە مۇعالىمدەردىڭ عانا ەمەس، اتا-انانىڭ دا ۇلەسى بار. قىركۇيەكتە ساباققا كەلگەننەن باستاپ دايىنداپ، قوسىمشا ءبىلىم بەرۋگە باسىمدىق بەردىك. تۇلەكتەردىڭ دەنى جاراتىلىستانۋ باعىتىن تاڭدادى. ليتسەي دە وسى سالاعا باسىمدىق بەرەدى. ءوزىم جوعارى وقۋ ورنىن بىتىرگەن سوڭ، سىنىپ الىپ، جەتەكشىلىك ەتتىم. العاشقى تۇلەكتەرىم وسى»، - دەدى ق. ساتبايەۆ مەكتەپ- ليتسەيىنىڭ فيزيكا ءپانىنىڭ ءمۇعالىمى جانسەيىت يساعاليەۆ.

تۇلەكتەردىڭ بىرەۋى 123 بالل جيناعان. مەكتەپتەگى ەڭ ۇلكەن كورسەتكىش وسى.

«مەن ۇبت كەزىندە 114 بالل جينادىم. وقۋدى الماتى قالاسىندا جالعاستىرامىن. اقپاراتتىق- تەحنولوگيا فاكۋلتەتىن تاڭداعان ەدىم. ءبىز جەكە-جەكە ەمەس، تۇگەل سىنىپ بولىپ دايىندالدىق. باسەكەلەستىك جوعارى بولدى. ناتيجەسىندە ءبارىمىز جوعارى بالل جيناپ، بىرگە گرانت يەلەندىك. باسەكەلەستىك بار جەردە دامۋ بولادى دەپ ويلايمىن. IT - جوعارى سۇرانىسقا يە ماماندىق. الداعى ۋاقىتتا قازاقستاندا جۇمىس ىستەپ، شەتەلدىك كومپانيالاردا ونلاين ەڭبەك ەتكىم كەلەدى»، - دەدى مەملەكەتتىك گرانت يەگەرى سۇلەيمەن ەلدوس ۇلى.

ايتا كەتەيىك، وبلىس بويىنشا بيىل 8 مىڭنان استام تۇلەك مەكتەپ ءبىتىردى. ونىڭ 3200 دەن استامى ءبىلىم گرانتىن يەلەندى.