ەلوردادا شاعىن جانە ورتا بينەسكە قانداي قولداۋ كورسەتىلەدى
بۇل تۋرالى استانا قالالىق ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى قۋانىش ساپاروۆ ايتتى، دەپ حابارلايدى قازاقپارات ءتىلشىسى.
قازىرگى ۋاقىتتا قالامىزدا 223597 شاعىن جانە ورتا بيزنەس سۋبەكتىسى جۇمىس ىستەيدى جانە ولاردا جۇمىسپەن قامتىلعان ادامداردىڭ سانى - 499445. بۇل ەلوردانىڭ ەكونوميكالىق بەلسەندى حالقىنىڭ 72,8 پايىزىن قۇرايدى. سونىمەن قاتار شوب سالاسىندا جۇمىسپەن قامتىلعاندار سانى ارتقانىن اتاپ وتكىم كەلەدى. 2022 -جىلدىڭ قورىتىندىسى بويىنشا ش و ب- تىڭ قالا ەكونوميكاسىنا قوسقان ۇلەسى 69,5 پايىزدى نەمەسە 7,2 تريلليون تەڭگەنى قۇرايدى. شوب- تىڭ باسەكەگە قابىلەتتىلىگىن ارتتىرۋ ماقساتىندا كاسىپكەرلەرگە ءبىرقاتار قولداۋ ءىس- شارالارى جۇرگىزىلۋدە. اتاپ ايتقاندا، كاسىپكەرلىكتى دامىتۋدىڭ ۇلتتىق جوباسى اياسىندا 4 باعىت بويىنشا قارجىلىق قولداۋ جۇزەگە اسىرىلادى، - دەدى قۋانىش ساپاروۆ استانا قالاسىنىڭ كوممۋنيكاتسيالار قىزمەتىندە وتكەن بريفينگتە.
ونىڭ اتاپ وتۋىنشە، ءبىرىنشى باعىت - كاسىپكەرلەردىڭ نەسيەلەرى بويىنشا سىياقى مولشەرلەمەلەرىن سۋبسيديالاۋ. بيىل بۇل باعىتتا ەكىنشى دەڭگەيلى بانكتەر ارقىلى 35,8 ميلليارد تەڭگە سوماسىنا 648 شارتقا قول قويىلدى.
ەكىنشى باعىت - كاسىپكەرلەردىڭ نەسيەلەرىنە ءىشىنارا كەپىلدىك بەرۋ. وسى جىلى 8,1 ميلليارد تەڭگەگە كەپىلدىك تولەۋ سوماسىنا 852 شارت راسىمدەلدى.
ءۇشىنشى باعىت - جەتىسپەيتىن ينفراقۇرىلىمدى جۇرگىزۋ. جەتىسپەيتىن ينفراقۇرىلىمدى جۇرگىزۋ ءۇشىن بيىل 1 جوباعا 112,8 ميلليون تەڭگە سوماسىنا قولداۋ كورسەتىلدى.
ءتورتىنشى باعىت - مەملەكەت تاراپىنان قايتارىمسىز نەگىزدە بەرىلەتىن گرانتتار.
سونىمەن قاتار اكىمدىك «دامۋ» قورىمەن بىرلەسىپ، «استانا بيزنەس» سالالىق شەكتەۋلەرسىز جەڭىلدىكپەن كرەديتتەۋ باعدارلاماسىن ىسكە اسىرادى. وسى باعدارلاما بويىنشا كاسىبىن جاڭا باستاعان كاسىپكەرلەر 50 ميلليون تەڭگەگە دەيىن، جۇمىس ىستەپ جاتقان كاسىپكەرلەر 100 ميلليون تەڭگەگە دەيىن جەڭىلدەتىلگەن نەسيە الا الادى. بۇل نەسيەنىڭ سىياقى مولشەرلەمەسى 7 پايىزدى قۇرايدى. 7 جىلعا دەيىنگى مەرزىمگە بەرىلەدى. اتالعان باعىتقا بيىل 1 ميلليارد تەڭگە قاراستىرىلعان، - دەيدى ول.