ديماش، گولوۆكين: تانىمال تۇلعالار ارقىلى ءتۋريزمدى قالاي دامىتۋعا بولادى

استانا. قازاقپارات - سوڭعى جىلدارى جەرلەستەرىمىز مۋزىكا، سپورت، كينو جانە تاعى باسقا سالالار بويىنشا ەلىمىزدى الەمگە تانىتىپ ءجۇر.

«Kazakh Tourism» ۇلتتىق كومپانياسى باسقارما ءتوراعاسىنىڭ ورىنباسارى قايرات ءسادۋاقاسوۆ قازاقپارات تىلشىسىنە بەرگەن ەكسكليۋزيۆتى سۇحباتىندا وتاندىق تانىمال تۇلعالار ارقىلى ىشكى ءتۋريزمدى دامىتۋ تۋرالى ايتىپ بەردى.

«ديماش قۇدايبەرگەن - 2018 -جىلى تاڭدالعان وتاندىق ءتۋريزمنىڭ العاشقى امباسسادورى. ءبىز ديماشتىڭ تۋرىن ۇيىمداستىرىپ، قىتايلىق جانكۇيەرلەر مەن تۋروپەراتورلاردى اكەلدىك، كەيىن پاندەميا باستالىپ كەتتى. وسىلايشا تۋريستەردى تارتۋدىڭ ادىستەمەسى جاسالدى. بۇل جەردە جەرگىلىكتى اتقارۋشى ورگاندار ىسكە جۇمىلۋى كەرەك، سونىڭ ىشىندە ديماشتىڭ تۋىپ- وسكەن جەرى اقتوبە وبلىسىنىڭ اكىمدىگى دە بار. «Kazakh Tourism» كومپانياسىنىڭ بۇكىل ەلدى قامتۋى مۇمكىن ەمەس. اكىمدىكتەر وسى باعىتتا جۇمىس ىستەۋى كەرەك. ديماشتان باسقا يمانبەك، گەنناديي گولوۆكين، الەكساندر ۆينوكۋروۆ تاعى باسقالار تۋريزم امباسسادورى بولا الادى. شەتەلدە تانىمال قازاقستاندىقتاردىڭ سانى جەتكىلىكتى. سونىمەن قاتار ىشكى ءتۋريزمدى ىلگەرىلەتۋدە شەتەلدىك ينفليۋەنسەرلەردى تارتۋ قاجەت»، - دەيدى قايرات ءسادۋاقاسوۆ.

سپيكەردىڭ ايتۋىنشا، شۆەيتساريانىڭ تاجىريبەسىنە سۇيەنە وتىرىپ، شەتەلدىك جۇلدىزداردى تارتۋ كەرەك.

«مىسالى، رودجەر فەدەرەر - تەننيستەن چەمپيون جانە شۆەيتساريانىڭ امباسسادورى. ءبىراق ول شۆەيتساريانى جالعىز ءوزى تانىمال ەتە المايدى. وسى ورايدا ولار تانىمال اكتەر روبەرت دە نيرونى تارتتى. رودجەر فەدەرەر مەن روبەرت دە نيرونىڭ سويلەسكەن ءساتىنىڭ ۆيدەوسى بارلىق جەردە تارادى جانە ر. فەدەرەر روبەرت دە نيرونى ءوز ەلىنە شاقىرادى. ماركەتينگ ءوزارا بايلانىس بار كەزدە جاقسى جۇمىس ىستەيدى. وسى ورايدا وتاندىق تانىمال ازاماتتار شەتەلدە قازاقستان تۋرالى ايتىپ جۇرسە، كەرەمەت ەمەس پە؟ ! شەتەلدىك جۇلدىزداردى تارتۋ قاجەت. ول ءۇشىن قانشا قاراجات قاجەت ەكەنىن بىلەمىز»، - دەيدى ول.