قانداي شەتەلدىكتەر ىقتيارحاتقا جەڭىلدەتىلگەن تارتىپپەن ءوتىنىش بەرە الادى

استانا. قازاقپارات - قازاقستانعا سۇرانىسى بار كاسىپتەر بويىنشا شەتەلدەن ماماندار تارتۋ ءتارتىبىن بەكىتتى.

بۇل تۋرالى ۇكىمەت وتىرىسىندا كوشى-قون ساياساتى تۇجىرىمداسىن ىسكە اسىرۋ بارىسىن تالقىلاۋ كەزىندە پرەمەر- ءمينيستردىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى قازاقپارات ءتىلشىسى.

«بيىل 1-شىلدەدەن باستاپ ورتالىق جانە جەرگىلىكتى اتقارۋشى ورگاندارمەن بىرلەسىپ، سۇرانىسى بار كاسىپتەردىڭ تىزبەسى بەكىتىلىپ، ناقتى جۇمىس باستالدى. ەندى وسى تىزىمدەگى ماماندىعى بار شەتەلدىكتەر ەلىمىزدە تۇراقتى تۇرۋعا ىقتيارحات الۋ ءۇشىن جەڭىلدەتىلگەن تارتىپپەن ءوتىنىش بەرە الادى. سونداي- اق، رۇقسات بەرۋدىڭ جاڭا قاعيدالارى قابىلداندى. ونىڭ باستى جاڭالىعى - ەندى ءبىر رۇقساتنامامەن بىرنەشە وڭىردە جۇمىس ىستەۋگە بولادى»، - دەدى ت. دۇيسەنوۆا.

ونىڭ ايتۋىنشا، بيىل شەت ەلدىك مامانداردىڭ كۆوتاسى 22 مىڭ سانىمەن بەكىتىلدى.

«رۇقساتنامالار بەرۋدىڭ نەگىزگى شارتىنا توقتالساق، مۇنداي ماماندار ەلىمىزدىڭ ەڭبەك نارىعىندا بولماعان كەزدە رۇقسات ەتىلەدى. سونىمەن قاتار، جۇمىس ورنىندا قازاقستاندىق مامانداردىڭ ۇلەسى 95 پايىزدان تومەن بولماۋى قاجەت»، - دەدى مينيستر.

بۇدان بۇرىن حابارلانعانداي، قازاقستانعا نەگىزىنەن قاي ەلدىڭ ازاماتتارى قونىس اۋدارىپ جاتقانى انىقتالدى.