قازاقستان اۋعانستان قىزدارىن وقىتۋ باعدارلاماسىن جالعاستىرۋعا دايىن

استانا. قازاقپارات - قازاقستان اۋعانستان قىزدارىنا ءبىلىم بەرۋ باعدارلاماسىن جالعاستىرۋعا دايىن. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات.

«اۋعانستان بيلىگىنىڭ قىز بالالاردى 6-سىنىپتان كەيىن مەكتەپتە وقۋعا جانە ايەلدەرگە مەملەكەتتىك مەكەمەلەر مەن حالىقارالىق ۇيىمداردا جۇمىس ىستەۋىنە ۋاقىتشا تىيىم سالعانى تۋرالى اقپاراتتى ۇلكەن الاڭداۋشىلىقپەن قابىلدادىق. ايەلدەردىڭ قۇقىعىن قورعاۋ مەن گەندەرلىك تەڭدىكتى ىلگەرىلەتۋ ماسەلەسى ءاردايىم ۇكىمەتتىڭ نازارىندا. بۇل ماسەلە ءبىزدىڭ ەلدىڭ ب ۇ ۇ ادام قۇقىقتارى جونىندەگى كەڭەسىنە مۇشەلىگىمىزدە 2022-2024 -جىلعى باسىمدىقتارىنىڭ ءبىرى بولىپ سانالادى»، - دەدى ايبەك سمادياروۆ مينيسترلىكتىڭ اپتالىق بريفينگىندە.

ونىڭ ايتۋىنشا، ەلىمىز اۋعانستاندى قالپىنا كەلتىرۋ ءۇشىن قارجىلىق، تەحنيكالىق جانە گۋمانيتارلىق كومەكتى جۇزەگە اسىرۋ بويىنشا وڭىرلىك جانە حالىقارالىق باستامالار شەڭبەرىندە ءارتۇرلى باعدارلامالارعا بەلسەندى قاتىسىپ وتىرادى.

اتاپ ايتقاندا، 2017 -جىلى قازاقستان اۋعانستانداعى ايەل ازاماتشالار ءۇشىن وقىتۋ باعدارلاماسىن جۇزەگە اسىرۋ تۋرالى باستاما كوتەرگەن بولاتىن. بۇل ەۋروپالىق وداقتىڭ قولداۋىن تاۋىپ، 2022 -جىلعا دەيىن ىسكە اسىرىلىپ كەلدى.

«ازىرگە بۇل باستاما توقتاپ تۇر. اۋعانستان ۇكىمەتىنىڭ كەلىسىمى بولعان جاعدايدا ءبىز بۇل باعدارلامانى جالعاستىرۋعا دايىنبىز. بۇل ماسەلەنى تالقىلاپ وتىرامىز، ەندى اۋعان تاراپىنىڭ جاۋابىن كۇتەمىز»، - دەدى ايبەك سمادياروۆ.