استانادا بايگەدەن الامان جارىس ءوتتى - فوتو
چەمپيوناتتى ق ر ۇلتتىق سپورت قاۋىمداستىعى مەن رەسپۋبليكالىق «بايگە» فەدەراتسياسى ۇيىمداستىردى.
جارىستى تاماشالاۋعا ق ر اقپارات جانە قوعامدىق دامۋ ءمينيسترى دارحان ءقىدىرالى، ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ پەن رەسپۋبليكالىق «بايگە» فەدەراتسياسىنىڭ پرەزيدەنتى قانات كوپبايەۆ ارنايى كەلدى.
الامان دودانىڭ اشىلۋىندا ءسوز العان ق ر اقپارات جانە قوعامدىق دامۋ ءمينيسترى دارحان ءقىدىرالى سوڭعى ۋاقىتتا ەلىمىزدە ۇلتتىق سپورت تۇرلەرىنىڭ تانىمدىلىعى ارتقانىن ايتىپ، جارىس جەڭىمپازدارىن قۇتتىقتادى.
«ءبىز جەلمەن جارىسقان، جىلقىنىڭ جالىندا وسكەن جۇرتتىڭ جۇرناعىمىز. سوندىقتان جىلقى دەسە، بايگە دەسە ءبارىمىزدىڭ دەلەبەمىز قوزىپ وتىرادى. جىلقى بىزگە قانات بايلايدى، ات - ءبىزدىڭ رۋحىمىز. سول رۋحقا قىزمەت جاساپ جۇرگەن ق ر ۇلتتىق سپورت قاۋىمداستىعى مەن رەسپۋبليكالىق «بايگە» فەدەراتسياسىنىڭ باسشىلارىنا ءوز ريزاشىلىعىمدى بىلدىرەمىن! قازاقتىڭ رۋحى ءاردايىم بيىك بولسىن! بۇگىنگى بايگەنىڭ جەڭىمپازدارىن شىن جۇرەكتەن قۇتتىقتايمىن» دەدى دارحان قۋاندىق ۇلى.
سالتاناتتى شارادا ءسوز العان ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ جارىستىڭ ماڭىزدىلىعىن تىلگە تيەك ەتتى.
«ۇلتتىق سپورتتىڭ ارتىندا ۇلتتىڭ رۋحى، ۇلتتىڭ نامىسى، تاريحى، مادەنيەتى مەن ءداستۇرى تۇر. مەملەكەت باسشىسى قاسىم- جومارت كەمەل ۇلى توقايەۆتىڭ تىكەلەي قولداۋىمەن سوڭعى جىلدارى ەلىمىزدە ۇلتتىق سپورت تۇرلەرى قارقىندى دامىپ كەلەدى. بۇگىنگى ءبىزدىڭ جارىسىمىزدى تاماشالاۋعا ارنايى كەلگەن ق ر اقپارات جانە قوعامدىق دامۋ ءمينيسترى دارحان قۋاندىق ۇلىنا العىس ايتامىن. بارشاڭىزعا بەلگىلى، قازىرگى تاڭدا ءبىز ەلىمىزدىڭ بارلىق وڭىرلەرىندە بايگەدەن جارىستاردى ۇيىمداستىرىپ ءجۇرمىز. وسىناۋ جاۋاپتى ءارى يگى جۇمىستاردىڭ باسىندا بولىپ، بارلىق جارىستاردىڭ جوعارى دەڭگەيدە وتۋىنە ات سالىسىپ جۇرگەن رەسپۋبليكالىق «بايگە» فەدەراتسياسىنىڭ پرەزيدەنتى قانات شوقان ۇلىنا دا ريزاشىلىعىمدى بىلدىرگىم كەلەدى!كەلەسى جىلى ەلىمىزدە بەسىنشى دۇنيەجۇزىلىك كوشپەندىلەر ويىندارى وتەدى. بۇل ءبىز ءۇشىن دە، ەلىمىز ءۇشىن دە - ماڭىزدى جوبا. بۇل شارا بارىسىندا جارىستاردىڭ كوپتەپ ءوتۋى ۇلتتىق سپورتىمىزدىڭ دامۋىنا زور پايداسىن تيگىزەدى. ودان بولەك تە، الداعى ۋاقىتتا ءبىز ءىرى- ءىرى دودالاردى ۇيىمداستىراتىن بولامىز. وسىلايشا ۇلتتىق سپورتىمىزدى بولاشاقتا الەمگە تانىتساق دەيمىز» دەدى يسلامبەك تولەۋباي ۇلى.
رەسپۋبليكالىق «بايگە» فەدەراتسياسىنىڭ پرەزيدەنتى قانات كوپبايەۆ سوڭعى ۋاقىتتا بايگە سپورتىنان وتەتىن جارىستارعا كەلەتىن كورەرمەندەر سانى ارتىپ جاتقانىن قۋانا جەتكىزدى.
«ءبىز ەلىمىزدىڭ وڭىرلەرىندە بايگە سپورتىنان جارىستاردى تۇراقتى تۇردە وتكىزىپ كەلەمىز. ماقساتىمىز - ۇلتتىق سپورتىمىز بايگەنىڭ تانىمدىلىعىن ارتتىرىپ، مارتەبەسىن ءوسىرۋ. ءبىر قۋانارلىعى، كۇن ساناپ بايگەگە قىزىعۋشىلىق تانىتىپ جاتقان كورەرمەندەر قاراسى كوبەيۋدە. بۇل ءبىزدىڭ دۇرىس باعىتتا جۇمىس ىستەپ جاتقاندىعىمىزدىڭ كورسەتكىشى»، - دەدى قانات شوقان ۇلى.
تۋرنيرگە ەلىمىزدىڭ بىرنەشە وڭىرىنەن 80 جۋىق تۇلپار قاتىسىپ، «قۇنان بايگە»، «توپ بايگە»، «جورعا جارىس»، «الامان بايگە» بويىنشا سايىسقا ءتۇستى. جارىستىڭ جۇلدە قورى - 23500000 تەڭگەنى قۇرادى.
جارىس ناتيجەلەرىنە كەلەر بولساق:
«قۇنان بايگە» 10 شاقىرىم:
1-ورىن الديار ۋايسحان «لازەر» ەسىمدى تۇلپارى؛
2-ورىن اسلانبەك ابدىقال «قاراقات» ەسىمدى تۇلپارى؛
3-ورىن نۇرمۇقاش ءدىلنۇر «مامليۋك» ەسىمدى تۇلپارى.
«توپ بايگە» 16 شاقىرىم:
1-ورىن ءامىر سەرىك «موي مير» ەسىمدى تۇلپارى؛
2-ورىن اسلانبەك ابدىقال «ابىراي» ەسىمدى تۇلپارى؛
3-ورىن بەكزات ءدىلداحان «ساكۋرا» ەسىمدى تۇلپارى.
«جورعا جارىسى» 9 شاقىرىم:
1-ورىن جان قوقانبايەۆ «سالكۇرەڭ» ەسىمدى تۇلپارى؛
2-ورىن ءاليا اسقاروۆا «مەسياتس ماي» ەسىمدى تۇلپارى؛
3-ورىن شۋاق جايلاۋبەك «جۇلدىز» ەسىمدى تۇلپارى.
«الامان بايگە» 23 شاقىرىم:
1-ورىن بەكزات ءدىلداحان «تالحيز» ەسىمدى تۇلپارى؛
2-ورىن ارنات مۇراتحان «سەمسەر» ەسىمدى تۇلپارى؛
3-ورىن ارنۇر سامات ۇلى «سامال» ەسىمدى تۇلپارى.
ايتا كەتەيىك، جارىس ۇيىمداستىرۋشىلارى 4-شى جانە 5-شى ورىن العان شاباندوزداردى دا اقشالاي سىيلىقپەن ماراپاتتادى.
ودان بولەك، جارىس بارىسىندا كورەرمەندەر ۇلتتىق كيىم بايقاۋىن تاماشالادى. بۇل سايىستىڭ جەڭىمپازدارىنا ۇيىمداستىرۋشىلار جالپى كولەمى 1 ميلليون تەڭگە سىياقى تابىستادى.