مەكتەپكە جول: كومەككە مۇقتاج اتا-انالار ءۇشىن جەدەل جەلى ىسكە قوسىلدى

استانا. قازاقپارات - ەلىمىزدىڭ ءىرى ساۋدا ورتالىقتارىندا مۇقتاج وتباسىلاردىڭ بالالارىنا مەكتەپكە دايىندىق بويىنشا كومەك كورسەتۋ پۋنكتتەرى اشىلدى.

ودان بولەك، اتا-انالاردىڭ ساۋالدارىنا جاۋاپ بەرەتىن جەدەل جەلى ىسكە قوسىلدى، دەپ حابارلايدى قازاقپارات ءتىلشىسى.

«مەكتەپكە جول» رەسپۋبليكالىق قايىرىمدىلىق اكسياسى 2008-جىلدان باستاپ تۇراقتى ۇيىمداستىرىلىپ كەلەدى. اتالعان كومەك از قامتىلعان، كوپبالالى وتباسىلاردىڭ بالالارى، اسىراۋشىسىنان ايىرىلعان جانە ەرەكشە بالالارعا باعىتتالعان. ودان بولەك، اتالعان ساناتتاعى بالالار جالپىعا بىردەي ءبىلىم بەرۋ قورىنان دا قارجىلاي كومەك الىپ كەلەدى»، - دەدى وقۋ-اعارتۋ ۆيتسە-ءمينيسترى ەدىل وسپان و ك ق- دە وتكەن بريفينگىدە.

ونىڭ ايتۋىنشا، اتالعان قايىرىمدىلىق شارا داستۇرگە اينالدى.

«وتكەن جىلى دەمەۋشىلەر مەن مەتسەناتتار 3 ميلليارد 781 ميلليون تەڭگەگە 204 مىڭنان استام وقۋشىعا كومەك كورسەتتى. بيىل قايىرىمدىلىق اكتسياسى 1-30- قىركۇيەك ارالىعىندا «جاقسىلىق جاسا» ۇرانىمەن وتەدى. ازاماتتاردىڭ وتىنىشىنە نازار اۋدارۋ ماقساتىندا جەدەل جەلى ىسكە قوسىلدى. ودان بولەك، ءىرى ساۋدا ورتالىقتارىندا مۇقتاج وقۋشىلارعا گۋمانيتارلىق كومەك كورسەتۋ پۋنكتتەرى اشىلدى. بالالاردىڭ قۇقىعىن قورعاۋ كوميتەتىندە 74-25-28 جەدەل بايلانىس تەلەفونىنا حابارلاسۋعا بولادى. سونداي-اق، BALA QORǴAÝ Telegram چاتى جۇمىس ىستەيدى»، - دەيدى ول.