قاراعاندىدا ۋلانعان بالالاردىڭ جاعدايى قالاي: دارىگەرلەر مالىمەت بەردى
كەشە وتكەن بريفينگتە دەنساۋلىق ساقتاۋ ءمينيسترى 1-تامىزدا اۋرۋحاناعا تاعى ەكى بالا جەتكىزىلگەنىن حابارلاعان بولاتىن. دارىگەرلەردىڭ ايتۋىنشا، ولاردىڭ جاعدايى تۇراقتى.
«ستاتسيونارلىق ەم الىپ جاتقان بالالاردىڭ جاعدايى تۇراقتى. 1-تامىزدا تۇسكەن ەكى پاتسيەنتتىڭ بىرەۋىنىڭ جاعدايى ورتاشا، ەكىنشىسىنىڭ جاعدايى قاناعاتتانارلىق. ەكەۋى دە بولىمشەدە»، - دەپ حابارلادى قاراعاندى وبلىسى دەنساۋلىق ساقتاۋ باسقارماسىنىڭ باسپا ءسوز قىزمەتى.
دارىگەرلەر مالىمدەگەندەي، التى بالا ءالى دە جانساقتاۋ بولىمىندە جاتىر.
31-شىلدەدە اۋرۋحاناعا تۇسكەن باسقا بالالاردىڭ جاعدايى جاقسارعان. ەكەۋى شىعارىلدى، تاعى بەسەۋى ينفەكسيالىق بولىمشەدە ەم الىپ جاتىر.
«قازىرگى ۋاقىتتا وبلىستىق كلينيكالىق اۋرۋحانانىڭ ينفەكسيالىق ورتالىعىنىڭ بولىمشەسىندە ەمدەلىپ جاتقان ەكى بالانىڭ جاعدايى جاقسارۋىنا بايلانىستى، اۋرۋحانادان شىعارىلدى. ولار م ءا س دارىگەرىنىڭ باقىلاۋىندا»، - دەپ تولىقتىردى ۆەدومستۆودان.
قازىرگى ۋاقىتتا ارنايى الەۋمەتتىك قىزمەتتەر ورتالىعىندا ەمحانالاردىڭ مەديتسينا قىزمەتكەرلەرىنىڭ كەزەكشىلىگى ۇيىمداستىرىلدى.
ەستەرىڭىزگە سالا كەتەيىك، 30-شىلدەدە قاراعاندى وبلىسىنىڭ بالالارعا ارناۋلى الەۋمەتتىك قىزمەت كورسەتۋ ورتالىعىندا بىرنەشە بالا ۋلانىپ، ولاردىڭ بىرەۋى قازا تاۋىپ، التاۋى جانساقتاۋ بولىمىندە جاتىر.
باس پروكۋراتۋرا ۋاكىلەتتى مەملەكەتتىك ورگاندار مەن اۋماقتىق پروكۋرورلارعا ەلدە وسىنداي مەكەمەلەرگە كەشەندى تەكسەرۋلەر ۇيىمداستىرۋدى تاپسىردى.
قر دەنساۋلىق ساقتاۋ ءمينيسترى اجار عينيات حابارلاعانداي، ىشەك ينفەكسيالارىنا جۇرگىزىلگەن سىناقتار تەرىس ناتيجە بەردى. بالالاردىڭ ۋلانۋىنىڭ ناقتى سەبەبى ءالى انىقتالعان جوق.