دەنساۋلىق مينيسترلىگى قاراعاندىدا ۋلانعان بالالار تۋرالى: كلينيكالىق بەلگىلەر تاماقتان ۋلانباعان

استانا. قازاقپارات - دەنساۋلىق ساقتاۋ ءمينيسترى اجار عينيات قاراعاندى وبلىسىنىڭ اكىمىمەن جانە ق ر د س م جەتەكشى ماماندار توبىمەن ارناۋلى الەۋمەتتىك قىزمەتتەر كورسەتۋ ورتالىعىنىڭ توعىز تاربيەلەنۋشى بالاسى ۋلانىپ تۇسكەن وبلىستىق كلينيكالىق اۋرۋحانانىڭ ينفەكسيالىق ورتالىعىنا باردى.

بۇل تۋرالى قازاقپارات ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

باسپا ءسوز قىزمەتىنىڭ مالىمەتتەرىنە قاراعاندا، ا. عينيات جاعدايى اۋىر ءتورت پاتسيەنت جاتقان قارقىندى رەانيماتسيا بولىمشەسىندە بولدى. ولاردىڭ بارلىعى وكپەنى جاساندى جەلدەتۋ (ءو ج ج) اپپاراتىنا قوسىلعان. وسى كلينيكادا 10-15 جاس ارالىعىنداعى تاعى بەس بالا نەيروبوكسيرلەنگەن بولىمشەگە جاتقىزىلدى، ولاردىڭ جاعدايى ورتاشا اۋىرلىق دارەجەسىندە دەپ باعالانىپ وتىر.

ودان ءارى ۆەدومستۆو باسشىسى رەانيماتسيا بولىمشەسىندە مەديتسينالىق-الەۋمەتتىك مەكەمەدەن تۇسكەن تاعى ەكى پاتسيەنت جاتقان قالالىق بالالار اۋرۋحاناسىنا باردى.

مينيستر ءوڭىردىڭ دەنساۋلىق ساقتاۋ باسقارماسىنىڭ باسشىلارىمەن بىرلەسىپ مەديتسينالىق كومەك كورسەتۋ جاعدايلارىن قاراپ، ەمدەۋ پروتسەسىن جانە بالالار اۋرۋىنىڭ سەبەپتەرىن انىقتاۋ بويىنشا زەرتتەۋلەر جۇرگىزۋدى باقىلاۋعا الدى.

مامانداردىڭ ايتۋىنشا، انىقتالعان سانيتاريالىق-گيگيەنالىق بۇزۋشىلىقتار بالالاردىڭ جەكەلەگەن توبىنىڭ ءجىتى ىشەك ينفەكتسيالارىن (ج ءى ي) تۋدىرۋى مۇمكىن ەمەس. پاتسيەنتتەردەگى كلينيكالىق بەلگىلەر تاماقتان ۋلانۋعا ءتان ەمەس، مۇندا قايتا-قايتا قۇسۋ، ءىشتىڭ ءجيى ءوتۋى، كەيدە قان ارالاس ءىشتىڭ ءوتۋى، سۋسىزدانۋ بايقالادى.

ج ءى ي ءۇشىن ەپيدەپروتسەسس كورىنىستەرىنىڭ ءتان سپەكترى جوق: قىسقا ۋاقىت ىشىندە جاعدايلاردىڭ جاپپاي تىركەلۋى، بارلىق جاستاعى ادامداردىڭ، اسىرەسە جاس بالالار مەن بارىنشا السىرەگەن بالالاردىڭ ينفەكسياعا بەيىمدىلىگى، پورتسيانىڭ كولەمىنە جانە جۇقتىرعان اگەنتتىڭ الىنعان دوزاسىنا قاراي ءبىر ءونىمدى تۇتىنۋمەن بايلانىسى.

دەنساۋلىق ساقتاۋ مينيسترلىگىنىڭ باسشىسى قاراعاندىدا وتكەن بريفينگتە جۋرناليستەردىڭ زارداپ شەككەن بالالاردىڭ جاعدايى، پاتسيەنتتەرگە مەديتسينالىق كومەك كورسەتۋ بارىسى تۋرالى سۇراقتارىنا جاۋاپ بەردى.

بۇگىنگى تاڭدا تەرگەۋ جۇرگىزۋ ءۇشىن ارنايى كوميسسيا قۇرىلدى، ونىڭ ناتيجەلەرى بويىنشا بولعان وقيعانىڭ سەبەبى بويىنشا رەسمي اقپارات الىنادى.

بالالاردىڭ جاعدايى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ باقىلاۋىندا. قاجەتىنە قاراي كونسيليۋمدار، ەلدىڭ جەتەكشى بەيىندى كلينيكالارىمەن تەلەمەديتسينالىق كونسۋلتاتسيالار وتكىزىلەتىن بولادى.

قاجەت بولعان جاعدايدا بالالاردى رەسپۋبليكالىق ۇيىمدارعا اۋىستىرۋ جۇزەگە اسىرىلادى.