ادامدى ازدىرادى: اۋعانستاندا تالىپتەر مۋزىكالىق اسپاپتاردى ورتەپ جاتىر
ولاردىڭ پىكىرىنشە، مۋزىكا مورالدىق ازعىنداۋعا اكەلەدى، دەپ حابارلايدى قازاقپارات BBC اگەنتتىگىنە سىلتەمە جاساپ.
گيتارا، حالىقتىق پەركۋسسيالىق اسپاپتار، كۇشەيتكىشتەر مەن كولونكالاردى گەرات پروۆينتسياسىنداعى تالىپتەردىڭ ءدىني پوليتسياسى وتكەن دەمالىس كۇندەرى ورتەپ جىبەردى.
مۇنىڭ كوپ بولىگى توي وتەتىن ورىنداردان تاركىلەندى.
ىزگىلىكتى ىنتالاندىرۋ جانە جاماندىقتىڭ الدىن الۋ مينيسترلىگىنىڭ ايماقتىق فيليالىنىڭ باسشىسى شەيح ازيز راحمان مۋحادجيردىڭ ايتۋىنشا، مۋزىكا «جاستاردى جالعان باعىتقا باعىتتايدى جانە قوعامنىڭ جويىلۋىنا اكەلەدى»، دەپ حابارلادى باحتار مەملەكەتتىك اقپارات اگەنتتىگى.
2021 -جىلى تالىپتەر ەل بيلىگىنە ورالعاننان كەيىن ولار كوپ نارسەگە تىيىم سالدى - سونىڭ ىشىندە كوپشىلىك الدىندا مۋزىكا ورىنداۋعا دا تىيىم بار.
اۋعانستان ۇلتتىق مۋزىكالىق ينستيتۋتىنىڭ نەگىزىن سالۋشى احماد سارماست «مادەني گەنوتسيد جانە مۋزىكالىق ۆانداليزم» دەپ اتايدى. BBC-گە بەرگەن سۇحباتىندا ول اۋعان حالقىن شىعارماشىلىق ەركىندىكتەن ايىرىپ جاتقانىن اتاپ ءوتتى.
«گەراتتاعى مۋزىكالىق اسپاپتاردان جاسالعان الاۋ - «تاليباننىڭ» باسشىلىعىمەن اۋعانستاندا بولىپ جاتقان مادەني گەنوتسيدتىڭ تەك ءبىر بولىگى عانا»، - دەيدى ول.
تالىپتەر ءۇشىن مۋزىكامەن كۇرەس - ادەتتەگى ءىس: 1990 -جىلداردىڭ ورتاسىنان 2001 -جىلعا دەيىن ەلدى بيلەپ تۇرعان شاعىندا ولار قوعامدىق شارالاردا، راديو جانە تەلەارنالاردا كەز كەلگەن مۋزىكانى ورىنداۋعا تىيىم سالعان.
كەيىن، زايىرلى ۇكىمەت كەزىندە اۋعان مۋزىكالىق ساحناسى گۇلدەنگەن، الايدا 2021 -جىلدىڭ تامىزىندا «تاليباندار» قايتا ورالعاندا كوپتەگەن مۋزىكانتتار شەتەلگە قاشۋعا ءماجبۇر بولعان.
ناتو كۇشى ەلدەن كەتكەندە اۋعانستاندا قالعان انشىلەر مەن مۋزىكانتتار قىسىمعا ۇشىراعان. ۇلتتىق مۋزىكا ينستيتۋتىنىڭ ستۋدەنتتەرى مەن مۇعالىمدەرى وقۋعا قايتا كەلمەگەن.
ال، ايەلدەردەن تەك كوزى كورىنەتىندەي كيىنۋدى تالاپ ەتىپ وتىر. ۇيىنەن 72 شاقىرىم قاشىقتىققا شىققان ايەلدەردىڭ جانىندا تۋىس ەر ادام بولۋى مىندەتتى.
قىزدارعا جانە ايەلدەرگە مەكتەپكە نەمەسە ۋنيۆەرسيتەتكە، سپورتزالعا نەمەسە ساياباققا بارۋعا تىيىم سالىندى.
وسى جىلدىڭ شىلدە ايىنىڭ باسىندا تاليبان ۇكىمەتى جانىنداعى ىزگىلىكتى ىنتالاندىرۋ جانە جاماندىقتىڭ الدىن الۋ مينيسترلىگى ەلدەگى بارلىق شاشتارازدار مەن سۇلۋلىق سالوندارىن ءبىر اي مەرزىمگە جابۋ تۋرالى بۇيرىق شىعاردى، بۇل ايەلدەر قۇقىعىنا تاعى ءبىر سوققى بولدى.