تامىز ايىندا اۋا رايى قانداي بولادى

استانا. قازاقپرات - قازگيدرومەت سينوپتيكتەرى تامىز ايىنا ارنالعان اۋا رايى بولجامىن ۇسىندى. ولاردىڭ ايتۋىنشا، تامىز جاز ماۋسىمىن اياقتايدى جانە قازاقستاننىڭ باسىم بولىگىندە تۇراقسىز اۋا رايىنان باستالادى.

اتموسفەرالىق فرونتتاردىڭ اسەرىنەن جاۋىن- شاشىن، بۇرشاق جاۋىپ، نايزاعاي وينايدى، ەكپىندى جەل تۇرادى، دەپ حابارلايدى قازاقپارات.

ايدىڭ ءبىرىنشى ونكۇندىگىندە اۋا تەمپەراتۋراسى شامالى تومەندەيدى. رەسپۋبليكانىڭ سولتۇستىگىندە، ورتالىعىندا، شىعىسىندا تۇندە 12+22 گرادۋستان 10+18 گرادۋسقا دەيىن، كۇندىز 30+35 گرادۋستان 22+30 گرادۋسقا دەيىن، وڭتۇستىك وڭىرلەردە تۇندە 20+27 گرادۋستان 18+23 گرادۋسقا دەيىن، كۇندىز 34+42 گرادۋستان 28+35 گرادۋسقا دەيىن قۇبىلادى.

ەلىمىزدىڭ باتىسىندا اۋا تەمپەراتۋراسى تۇندە 13+20 گرادۋستان 20+25 گرادۋسقا دەيىن، كۇندىز 25+30 گرادۋستان 33+41 گرادۋسقا دەيىن؛ وڭتۇستىك- باتىستا تۇندە 20+25 گرادۋستان + 25+30 گرادۋسقا دەيىن شامالى اۋىتقيدى.

كۇندىز اۋا تەمپەراتۋراسى 30+40 گرادۋس شەگىندە ساقتالادى.

تامىزدىڭ ەكىنشى جانە ءۇشىنشى ونكۇندىكتەرىندە رەسپۋبليكا اۋماعىندا باريكالىق تۇزىلىمدەردىڭ كەزەكتەسۋى بايقالادى.

ىستىق جانە قۇرعاق كۇندەر سالقىن جانە جاڭبىرلى، كەيدە نايزاعاي مەن بۇرشاققا اۋىسىپ وتىرادى.

اۋا تەمپەراتۋراسى سولتۇستىك ايماقتاردا تۇندە 13+20 گرادۋستان 8+15 گرادۋسقا دەيىن، كۇندىز 17+25 گرادۋستان 23+30 گرادۋسقا دەيىن اۋىتقيدى، وڭتۇستىك جانە باتىس ايماقتاردا اۋا تەمپەراتۋراسىنىڭ نەگىزگى فونى تۇندە 13+22 گرادۋس، كۇندىز 28+38 گرادۋس.

ايتا كەتەيىك، ءبىر ايعا ارنالعان بولجامدى كونسۋلتاتيۆ رەتىندە پايدالانۋ كەرەك. ول كەيىننەن سينوپتيكالىق جاعدايدىڭ وزگەرۋىنە قاراي تۇزەتىلەدى جانە ونكۇندىككە ارنالعان اۋا رايى بولجامدارىمەن ناقتىلانادى.