قىتاي ينۆەستورلارى تۇركىستان وڭىرىندە ماقتا شارۋاشىلىعىن دامىتۋعا نيەتتى

تۇركىستان. قازاقپارات - تۇركىستان وبلىسىندا ماقتا ءوسىرۋ ءۇشىن قىتايدىڭ اۋىل شارۋاشىلىعى تەحنولوگيالارى ەنگىزىلمەك.

اۆتوماتتاندىرىلعان زاماناۋي تەحنولوگيا «اق التىندى» ەگىپ، تەرۋگە دەيىنگى جۇمىستى ءوزى اتقارادى، دەپ حابارلايدى قازاقپارات وبلىس اكىمدىگىنىڭ باسپا ءسوز قىزمەتىنە سىلتەمە جاساپ.

تۇركىستان وبلىسىنىڭ اكىمى دارحان ساتىبالدى قىتايلىق «Peng Sheng Group» باسشىلارىمەن كەزدەستى. كومپانيا كورشى وزبەكستان ەلىندە بىرنەشە ءىرى جوبالاردى ءساتتى جۇزەگە اسىرىپ جاتىر.

بىرەگەي جوبانى وبلىستىڭ وڭتۇستىك اۋداندارىندا ىسكە اسىرۋدى كوزدەگەن قىتايلىق ينۆەستورلار ماقتا ساپاسى مەن كولەمى ەداۋىر ارتاتىنىنا سەنىمدى. ول ءۇشىن تامشىلاتىپ سۋارۋ جۇيەسى قۇرىلعىلارى ورناتىلادى.

جوبا قۇنى - 46 ميلليون ا ق ش دوللارى. تاراپتار وسى جوبانى تالقىلادى.

سونداي-اق كومپانيا تۇركىستان وبلىسىندا بىلعارى وڭدەۋ جانە ءىرى قارا مال قالدىقتارىنان جەلاتين وندىرەتىن زاۋىت سالۋعا دايىن. بيزنەس- جوسپاردىڭ قۇنى - 10 ميلليون ا ق ش دوللارى. شەتەلدىك ينۆەستورلار يندۋستريالدى ايماقتا جۇمىس ىستەۋگە نيەتتى.

وبلىس اكىمى مەملەكەت باسشىسى قاسىم-جومارت توقايەۆتىڭ اۋىل شارۋاشىلىعى سالاسىنا، قايتا وڭدەۋ ءىسىن دامىتۋعا، جاڭا وندىرىستىك جوبالاردى جۇزەگە اسىرۋعا ەرەكشە باسىمدىق بەرىپ جاتقانىن اتاپ ءوتتى. تۇركىستان وبلىسىنىڭ ەرەكشەلىكتەرىنە توقتالىپ، جاقىندا بولعان قىتاي ساپارى ناتيجەسىندە جۇزەگە اساتىن بىرلەسكەن جوبالار تۋرالى وي قوزعادى. جاڭا جوبالاردى جان- جاقتى قولداۋعا، مەملەكەت تاراپىنان كورسەتىلۋى ءتيىس قولداۋلاردى ۇسىنۋعا ءازىر ەكەنىن ءبىلدىردى.

«سىزدەردىڭ وزبەكستاننىڭ سىرداريا وبلىسىندا باستاعان جۇمىستارىڭىزبەن تانىسقانمىن. كەرەمەت جوبالار ىسكە اسىرىلعان. جاقىن ارادا ءبىز وبلىستىڭ دەلەگاتسياسىمەن قىتايدا جۇمىس ساپارىمەن بولدىق. ەڭ ءىرى دەگەن ءوندىرىس الپاۋىتتارىنىڭ جۇمىسىمەن تانىستىق. تاجىريبە الدىق. ەندى سونى ىسكە اسىرۋعا مۇددەلىمىز. وبلىستىڭ بەس اۋدانىنىڭ اكىمدەرى دە بىرەر كۇن بۇرىن قىتايداعى ءىرى ءوندىرىس ورىندارىندا بولدى. وسى جۇمىستار ناتيجەسى رەتىندە بۇگىنگى جوبالاردى جان- جاقتى قولداۋعا دايىنبىز»، - دەدى تۇركىستان وبلىسىنىڭ اكىمى دارحان ساتىبالدى.

تاراپتار ينفراقۇرىلىمدى دامىتۋ جۇمىستارىن تالقىلادى. وبلىس باسشىسى تۇركىستان وڭىرىندە جۇزەگە اسىپ جاتقان اۋقىمدى جوبالارعا توقتالدى.

ءوز كەزەگىندە قىتاي ينۆەستورى تۇركىستان ءوڭىرى مەن وبلىس ورتالىعىنىڭ ەكونوميكالىق دامۋ باعىتىن جوعارى باعالاپ، ءبىرقاتار جوبالارعا قىزىعۋشىلىق تانىتتى. بىرلەسكەن جوبالاردىڭ ءارى قاراي دا جالعاساتىنىن اتاپ ءوتتى.