اقمولا وبلىسىندا مەملەكەتارالىق ىزدەۋدە جۇرگەن ءۇش قىلمىسكەر ۇستالدى

كوكشەتاۋ. قازاقپارات - اقمولا وبلىسى اۋماعىندا مەملەكەتارالىق ىزدەۋدە جۇرگەن ءۇش قىلمىسكەر ۇستالدى، دەپ حابارلايدى قازاقپارات ءتىلشىسى وبلىستىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

دەپارتامەنت مالىمەتىنشە، قىلمىسكەرلەردىڭ بىرىنە رەسەيدىڭ چەليابى وبلىسىنىڭ ءتارتىپ ساقشىلارى ر ف قىلمىستىق كودەكسى 322-بابىنىڭ 2-بولىگى «رەسەي فەدەراتسياسىنىڭ مەملەكەتتىك شەكاراسىن زاڭسىز كەسىپ ءوتۋ» بويىنشا قىلمىستىق قۇقىق بۇزۋشىلىق جاساعانى ءۇشىن ىزدەۋ جاريالاعان. ونى پوليتسيا قىزمەتكەرلەرى كوكشەتاۋ قالاسىنىڭ اۋماعىنان ۇستادى.

ال ەكىنشى قىلمىسكەر - اقمولا وبلىسىنىڭ تۋماسىن ءتارتىپ ساقشىلارى جەدەل-ىزدەستىرۋ ءىس-شاراسى بارىسىندا جارقايىڭ اۋدانىنىڭ اۋماعىنان تاپتى.

«ۇستالعان ادام بۇرىن دەنساۋلىققا قاساقانا اۋىر زيان كەلتىرگەنى ءۇشىن سوتتالعان (ق ر ق ك 106-بابى 1-بولىگى). سوت قاۋلىسىنا سايكەس ول قالعان مەرزىمگە شارتتى تۇردە مەرزىمىنەن بۇرىن بوساتىلدى، الايدا تۇرعىلىقتى جەرى بويىنشا بەلگىلەنۋگە كەلمەي استانا قالاسىنا كەتىپ قالعاندىقتان، ىزدەۋ جاريالاندى. قازىرگى ۋاقىتتا ول ۋاقىتشا ۇستاۋ يزولياتورىنا قامالدى»، - دەدى ۆەدومستۆودان.

سونىمەن قاتار، ستەپنوگور قالاسى اۋماعىندا ق ر قىلمىستىق كودەكسى 190-بابىنىڭ 3-بولىگى «الاياقتىق» بويىنشا مەملەكەتارالىق ىزدەۋدە جۇرگەن قىلمىسكەر قولعا ءتۇستى.

ايتا كەتسەك، بۇدان بۇرىن اقمولا وبلىسىندا شەتەلدەن كەلىپ، ءدىن ۋاعىزداپ جۇرگەن 29 ميسسيونەر بارىن جازعان ەدىك.