وقۋ جىلىن ۇزارتۋدىڭ ناتيجەلىلىگىنە مونيتورينگ جۇرگىزىلىپ جاتىر

استانا. قازاقپارات - ەلىمىزدە وقۋ جىلىن ۇزارتۋدىڭ ناتيجەلىلىگى مەن تيىمدىلىگىنە مونيتورينگ جۇرگىزىلىپ جاتىر.

بۇل جايىندا ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى - ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«2022-جىلى ۇلتتىق ءبىلىم اكادەمياسى جانىنداعى عىلىمي-ادىستەمەلىك كەڭەستىڭ شەشىمىمەن ورتا ءبىلىم بەرۋ ماسەلەلەرى جونىندەگى جۇمىس توبى قۇرىلدى. جۇمىس توبى وقۋ جىلىنىڭ وڭتايلى ۇزاقتىعى بويىنشا حالىقارالىق تاجىريبەگە تالداۋ جۇرگىزدى. جالپى وقۋ جىلىن ۇزارتۋ جونىندەگى شەشىم ەكونوميكالىق ىنتىماقتاستىق جانە دامۋ ۇيىمىنىڭ (ە ى د ۇ) ستاندارتتارىنا سايكەستەندىرۋ ءۇشىن قابىلداندى. ە ى د ۇ ەلدەرىنىڭ الەمدىك تاجىريبەسى كورسەتكەندەي، كوپتەگەن ەلدەردىڭ مەكتەپتەرىندە وقۋ جىلىنىڭ ۇزاقتىعى 36 اپتادان (فينليانديادا – 38، سينگاپۋردا – 39، تۇركيادا – 39، پولشادا – 39، وڭتۇستىك كورەيا مەن قىتايدا – 42، شۆەيتساريادا – 43، گەرمانيادا 44، دانيادا - 45 اپتا) اسادى. قازىرگى ۋاقىتتا ى. التىنسارين اتىنداعى ۇلتتىق ءبىلىم اكادەمياسى وقۋ جىلىنىڭ ۇزاقتىعىن ۇلعايتۋدىڭ ناتيجەلىلىگى مەن تيىمدىلىگىنە مونيتورينگ جۇرگىزۋدە»، - دەلىنگەن تامارا دۇيسەنوۆانىڭ جاۋابىندا.

اتاپ وتىلگەندەي، مونيتورينگ بارىسىندا ءبىلىم الۋشىلاردىڭ، اتا-انالاردىڭ، پەداگوگتەردىڭ پىكىرلەرى زەردەلەنەدى. ونىڭ ناتيجەلەرى ۇلتتىق ءبىلىم اكادەمياسىنداعى ساراپتامالىق كەڭەستىڭ تالقىلاۋىنا ۇسىنىلاتىن بولادى. ساراپتامالىق كەڭەستىڭ قۇرامىنا قوعامدىق بىرلەستىكتەردىڭ، اتا-انالار كوميتەتتەرىنىڭ، رەسپۋبليكالىق جەكەمەنشىك مەكتەپتەر قاۋىمداستىعىنىڭ، مەملەكەتتىك ۇيىمدار مەن ۆەدومستۆولاردىڭ وكىلدەرى كىرەدى جانە ولاردىڭ ءتىزىمى اكادەميانىڭ سايتىندا جاريالانعان.

«ساراپتامالىق كوميسسيا مۇشەلەرىنىڭ پىكىرىنشە، 36 اپتاداعى وقۋ جىلىنىڭ تيىمدىلىگىن تولىق تالداۋ ءۇشىن وسى ۇزاقتىقتاعى وقۋ جىلىن ۇيىمداستىرۋدىڭ كەمىندە ەكى-ءۇش جىلى قاجەت. قازىرگى كەزدە ۇلتتىق ءبىلىم اكادەمياسى وقۋ جىلىن ۇلعايتۋدىڭ ناتيجەلىلىگى مەن تيىمدىلىگىنە مونيتورينگ جۇرگىزۋدە جانە ناتيجەسى بويىنشا ءتيىستى شەشىم قابىلداناتىن بولادى»، - دەدى مينيستر.