ەلوردا تۇلەكتەرى جوعارى ءبىلىم اقىسىنا كومەك الۋ ءۇشىن نە ىستەۋ كەرەك
«ول ءۇشىن ءوتىنىش بەرۋشى قالالىق جۇمىسپەن قامتۋ جانە الەۋمەتتىك قورعاۋ باسقارماسىنا وتىنىشپەن بىرگە جەكە كۋالىگىن، وتباسى مۇشەلەرىنىڭ جالپى تابىسى تۋرالى مالىمەت، اتا-اناسى بولماسا، ولاردىڭ قايتىس بولعانى تۋرالى كۋالىك كوشىرمەسىن، كوپبالالى وتباسى بولسا، سونى كۋالاندىراتىن قۇجات كوشىرمەسىن، تۋۋ تۋرالى كۋالىك كوشىرمەسىن (جەتىم بالالار ءۇشىن)، استانا قالاسىندا ورتا مەكتەپتى ءتامامداعانى تۋرالى اتتەستاتتى، ۇ ب ت سەرتيفيكاتىن، ەكىنشى دەڭگەيلى بانكتەن نەمەسە «قازپوشتا» اكسيونەرلىك قوعامىنان اشقان شوت ءنومىرىن ۇسىنۋى كەرەك»، - دەدى باسقارما وكىلى.
بۇل جەردە الەۋمەتتىك كومەك ەڭبەك نارىعىندا نەعۇرلىم سۇرانىسقا يە ماماندىقتار بويىنشا وقيتىندارعا بەرىلەتىنىن ايتۋ كەرەك. اتالمىش كومەك ۇ ب ت- دان قاجەتتى شەكتى بال جيناي الماعان تۇلەكتەرگە بەرىلمەيدى.
جوعارىدا اتالعان قۇجاتتاردى قالالىق جۇمىسپەن قامتۋ جانە الەۋمەتتىك قورعاۋ باسقارماسىنا استانا قالاسى، بەيبىتشىلىك كوشەسى، 9 مەكەنجايى بويىنشا وتكىزۋ كەرەك.
ايتا كەتەيىك، بيىل استانا بيۋدجەتىنەن الەۋمەتىك تۇرعىدان مۇقتاج ساناتتاعى مەكتەپ تۇلەكتەرىنە جوعارى ءبىلىم اقىسى بويىنشا كومەك بەرۋ ءۇشىن 115 ميلليون تەڭگە بولىنبەكشى.