اپتاپ ىستىق ادام پسيحيكاسىنا اسەر ەتەدى

الماتى. قازاقپارات - شىلدەنىڭ شىلىڭگىر ىستىعى تۇرعىنداردىڭ پسيحيكالىق دەنساۋلىعىنا اسەر ەتەدى. بۇل تۋرالى الماتى قالاسىنىڭ باس پسيحياترى ايتتى، دەپ حابارلايدى قازاقپارات ءتىلشىسى.

الماتى قالالىق پسيحيكالىق ساۋىقتىرۋ ورتالىعىنىڭ ديرەكتورى ساپار راحمەنشەيەۆ قاتتى ىستىقتا سىركەسى سۋ كوتەرمەي، السىزدىك، ۇيقىسىزدىق قالجىراتىپ، مىنەز- قۇلقىندا وزگەرىستەر سىر بەرگەن الماتىلىقتاردى مەديتسينالىق كومەككە جۇگىنۋگە شاقىردى. ونىڭ ايتۋىنشا، اپتاپ ىستىق ادام اعزاسىندا گورمونالدى وزگەرىستەردىڭ پايدا بولۋىنا تۇرتكى بولادى. مۇنىڭ ناتيجەسىندە اعزادا دوفامين، ادرەنالين، كورتيزول، سەروتونين كوپ بولىنەدى. «بۇعان قوسا، بۇكىل دۇنيەنى تۇمشالاپ تاستاعانداي قاپىرىقتا ۇيقى بۇزىلادى، جۇمىس ىستەۋگە زاۋقى بولمايدى. كوڭىل كۇيى تەز قۇبىلىپ، كۇيزەلىسكە ءتۇسىپ كەتۋى ابدەن مۇمكىن. مي قىزمەتىنىڭ جۇمىسى ناشارلايدى. كۇن رايىنىڭ قولايسىزدىعىنان ادامداردىڭ ەموتسياسىن باسقارۋ مۇمكىندىگى تەجەلەدى. اشۋلانشاق، اگرەسسيالىق مىنەزدىڭ اياق استىنان پايدا بولۋى دا عاجاپ ەمەس. دەگبىرسىز كۇي، السىزدىك، تابەتتىڭ بولماۋى پسيحولوگيالىق جاعدايعا اسەر ەتەدى»، - دەيدى ورتالىق ديرەكتورى.

ماماننىڭ ايتۋىنشا، ىستىق كۇندە ءوزىڭىزدى قورعاۋ ءۇشىن قاراپايىم ەرەجەلەردى ساقتاۋ كەرەك.

«كۇن كوزىنەن بوي تاسالاپ، سۇيىقتىقتى كوپ ءىشىپ، سالقىن جەردە دەمالۋ كەرەك. الكوگولدى ونىمدەردى تۇتىنباعان ابزال. اپتاپ كەزدە پسيحيكالىق اۋرۋعا شالدىققان ناۋقاستاردىڭ دا دەنساۋلىعى سىر بەرۋى مۇمكىن»، - دەيدى ورتالىق باسشىسى.