بالا دەرتىن جاتىرداعى كەزىنەن انىقتايتىن قۇرىلعىلار توزعان - مينيسترلىك

استانا. قازاقپارات - جاتىردا دامىپ جاتقان بالانىڭ بويىندا تۇقىم قۋالايتىن اۋرۋلاردىڭ بار-جوعىن ەرتە انىقتايتىن قۇرىلعىلار توزعان.

بۇل تۋرالى اشىق نقا پورتالىندا جاريالانعان انا مەن بالا دەنساۋلىعىن ساقتاۋ قىزمەتىن دامىتۋ جونىندەگى 2024-2030 -جىلدارعا ارنالعان «ءاربىر ايەل - ءاربىر بالا» تۇجىرىمداماسىندا جازىلعان، دەپ حابارلايدى قازاقپارات ءتىلشىسى.

«2007-2010 -جىلدارى حروموسومالىق تۇقىم قۋالايتىن اۋرۋلارىنىڭ بار- جوعىنا قان زەرتتەۋلەرىن جۇرگىزۋ ءۇشىن رەسپۋبليكاداعى بارلىق پەريناتالدىق ورتالىقتار يممۋندىق- حيميالىق تالداۋىشتارمەن جاراقتاندىرىلعان. بۇگىندە ولار ساپالى پرەناتالدى سكرينينگ جۇرگىزۋگە قاۋقارلى ەمەس، توزعان. ولاردىڭ كوبى قازىرگى زامانعى تالاپتارعا ساي كەلمەيدى»، - دەپ جازىلعان تۇجىرىمداما-جوباسىندا.

دەنساۋلىق ساقتاۋ مينيسترلىگىنىڭ دەرەگىنشە، جاتىردا جاتقان بالانىڭ بويىندا بار اۋرۋلاردى ەرتە انىقتاي الماۋ سالدارىنان نارەستەلەر مۇگەدەك بولىپ تۋادى. تيىسىنشە، ولار ۇزاق ءارى قىمبات تۇراتىن ەمدى، ەرەكشە كۇتىمدى قاجەت ەتەدى.

«2010 -جىلدان باستاپ قازاقستان پەرزەنتحانالارىندا فەنيلكەتونۋريا مەن تۋا بىتكەن گيپوتيرەوزعا نەوناتالدىق سكرينينگ، بارلىق جاڭا تۋعان نارەستەلەر مەن 6 جاسقا دەيىنگى بالالاردىڭ ەستۋ قابىلەتىنىڭ بۇزىلۋىنا اۋديولوگيالىق سكرينينگ، پسيحوفيزيكالىق دامۋ سكرينينگى، شالا تۋعان نارەستەلەردىڭ رەتينوپاتياسىنا سكرينينگ جۇرگىزىلەدى. ستاتيستيكاعا سايكەس، 1000 بالانىڭ ىشىنەن 1-2 ۋى كەرەڭ بولىپ تۋادى. تاعى 2-4 بالانىڭ ەستۋ قابىلەتىندە وزگە دە دەرتتەر بايقالادى»، - دەپ دەرەكتەر كەلتىرىلگەن قۇجاتتا.