ويىن بارىسىندا گرۋزيالىق فۋتبولشىلاردىڭ بەلسەندىلىگى بايقالدى. قازاقستاندىق كلۋب قاقپاسىندا ءجيى بوي كورسەتتى. وعان «استانا» فۋتبولشىلارى لايىقتى قارسىلىق كورسەتتى. ويىننىڭ 22-مينۋتىندا «دينامونىڭ» جارتىلاي قورعاۋشىسى ۋسمان كامارا قازاقستاندىق قورعاۋشىلاردىڭ قاتەلىگىن پايدالانىپ، ەسەپ اشىپ كەتتى.
ەكىنشى كەزەڭنىڭ العاشقى مينۋتىندا «استانا» كومانداسى تارازى باسىن تەڭەستىرۋگە ۇمتىلعان ەدى. ناتيجەسىندە ابزال بەيسەبەكوۆ 50، دەمبو داربو 51-مينۋتىندا ەكى گول سوعىپ كەتتى.
وسىلايشا ەلوردالىق كلۋب قارسىلاسىنان 2:1 ەسەبىمەن باسىم ءتۇسىپ، جارىستى جالعاستىرۋعا مۇمكىندىك الدى.
«استانا» ەندى ەكىنشى ىرىكتەۋ ساتىسىندا «دينامو زاگرەب» كومانداسىمەن شەبەرلىك بايقاسادى. ويىن 25-شىلدە جانە 1-تامىز كۇندەرى بولادى.
ايتا كەتسەك، «استانا» 2015/16 -جىلعى كەزەڭدە اتالعان ءتۋرنيردىڭ توپتىق كەزەڭىندە ويىن كورسەتتى.
ال 2016، 2017، 2018 -جىلداردا ەۋروپا ليگاسى توپتىق كەزەڭىندە سىنعا ءتۇستى.
ال «دينامو تبيليسي» كونفەرەنسيا ليگاسى ەكىنشى ىرىكتەۋ ساتىسىندا 27-شىلدە مەن 3-تامىزدا مالتانىڭ «حامرۋن سپارتانس» (حامرۋن) كومانداسىمەن كەزدەسەدى.