جاز مەزگىلىندە قانداي سۋسىندار ىشكەن دۇرىس

استانا. قازاقپارات - كۇن سايىن جەتكىلىكتى مولشەردە سۋ تۇتىنۋ اعزانىڭ بارلىق فۋنكتسيالارىن، سونىڭ ىشىندە اس قورىتۋ مەن مەتابوليزمدى، قالدىقتاردى جويۋدى، سونداي-اق دەنە قىزۋىن قالىپتى ۇستاپ تۇرۋدى جانە اعزا مەن تىندەردىڭ دەنساۋلىعىن ساقتاۋ ءۇشىن قاجەت.

وسى ورايدا ق ر د س م سانيتارلىق-ەپيدەميولوگيالىق باقىلاۋ كوميتەتى دەنەدەگى سۋدىڭ جەتىسپەۋشىلىگىن بولدىرماۋ ءۇشىن ەرەسەكتەرگە دە، بالالارعا دا سۋ ءىشۋ ءتارتىبىن دۇرىس ۇيىمداستىرۋ جانە ساقتاۋ ماڭىزدى ەكەندىگىن ەسكە سالادى.

قورشاعان ورتا تەمپەراتۋراسىنىڭ جوعارىلاۋى كەزىندەگى سۇيىقتىقتار مەن سۋسىنداردىڭ ۇسىنىلاتىن ءتىزىمى:

- سالقىن، تازا سۋ (قايناتىلعان نەمەسە بوتەلكەدەگى) - ءشولدى قاندىرۋ ءۇشىن ەڭ جاقسى تاڭداۋ، سۋعا ليمون، قيار تىلىمدەرىن نەمەسە مۇز تەكشەلەرىن قوسۋعا بولادى؛

- جاسىل شاي دا قانتسىز نەمەسە تۇزسىز ءدام بەرەتىن قاراپايىم سۋعا ءدامدى، سەرگىتەتىن قوسىمشا بولىپ تابىلادى؛

- اقۋىزعا، كومىرسۋلارعا، كالتسيگە جانە ەلەكتروليتتەرگە باي ءسۇت جانە ءسۇت ونىمدەرى دەنە بەلسەندى بولعاندا نەمەسە تەرلەگەن كەزدە جوعالعان ناتريدىڭ ورنىن تولتىرۋعا كومەكتەسەدى؛

- جاسىل كوكونىستى (قىرىققابات، شپينات، بالدىركوك) نەمەسە قاۋىن، قاربىز جانە قيار سياقتى سۋ نەگىزىندەگى جەمىستەر مەن كوكونىستەر قوسىلعان جاڭا سىعىلعان شىرىندار مەن سمۋزيلەر دەنەنى ىلعالداندىرا وتىرىپ، پايدالى زاتتارمەن قامتاماسىز ەتەدى؛

ىستىقتا تۇتىنىلاتىن سۇيىقتىقتىڭ تەمپەراتۋراسىن باقىلاۋ ماڭىزدى، ول بولمە تەمپەراتۋراسىندا بولعانى ءجون.

قانتتى گازدالعان، ەنەرگەتيكالىق جانە الكوگولدى سۋسىنداردان اۋلاق بولۋعا تىرىسىڭىز.

ساپاسىز سۋ مەن سۋسىنداردى ءىشۋ تاماقتان ۋلانۋدى جانە جەدەل ىشەك ينفەكتسياسى، ديزەنتەريا، ا ۆيرۋستىق گەپاتيتى جانە باسقا دا جۇقپالى اۋرۋلاردى تۋدىرۋى مۇمكىن ەكەنىن ەستە ساقتاۋ كەرەك. سونىمەن قاتار، قانتتى گازدالعان سۋسىندار مەن ەنەرگەتيكالىق سۋسىنداردى كوپ تۇتىنۋ سەمىزدىك، قانت ديابەتى جانە جۇرەك-قان تامىرلارى اۋرۋلارىنىڭ ءقاۋپىنىڭ جوعارىلاۋىمەن بايلانىستى.