ۇشاققا ۇلتتىق اسپاپتارمەن كىرگىزە مە - مينيستر جاۋاپ بەردى
مينيستر مارات قارابايەۆتىڭ ايتۋىنشا، اۋە كومپانيالارى كوتەرىپ وتىرعان نەگىزگى ماسەلە - جولاۋشىلاردىڭ قاۋىپسىزدىگىن قامتاماسىز ەتۋ.
«ءبىز ولاردى (ۇلتتىق اسپاپتاردى) ۇشاققا قوسىمشا الىپ كىرۋگە رۇقسات بەرەمىز دەپ تۇرمىز. ءبىراق بۇل جەردە ەكى ماسەلە تۋىندايدى. ءبىرىنشىسى - ەگەر جولاۋشى جوعارى جاققا قول جۇگىن قويسا، دومبىرانى قويۋعا ورىن قالماي قالادى. ەكىنشىسى - جوعارى جاقتاعى جۇك قوياتىن جاعىنا اسپاپ سيا ما؟ ارينە، دومبىرانىڭ ءوزى سىيادى، ءبىراق ءار اسپاپتىڭ ءوز قاپشىعى بولادى عوي»، - دەيدى مينيستر ۇكىمەت كۋلۋارىندا.
قارابايەۆ قازىر اتالعان ماسەلە اۋە كومپانيالارىمەن تالقىلانىپ جاتقانىن اتاپ ءوتتى. يندۋستريا مينيسترلىگى وڭ شەشىم قابىلداۋعا ءۇمىتتى.
«ناقتى مىنا مەرزىمدە شەشىم قابىلدانادى دەپ ايتا المايمىز. ويتكەنى بۇل اۋە كومپانيالارىمەن، وسىنداي اسپاپتاردى الىپ جۇرەتىن ادامدارمەن قوسىمشا تالقىلانىپ جاتىر. ونىڭ ناتيجەسى ءبىرجاقتى بولادى دەپ قازىر ايتۋ قيىن. ەڭ باستىسى - قاۋىپسىزدىكتى قامتاماسىز ەتۋ»، - دەدى ۆەدومستۆو باسشىسى.
الايدا قارابايەۆ ۇلتتىق اسپاپتاردى ۇشاق بورتىنا كىرگىزۋگە قاتىستى شەشىم وسى جىلدىڭ سوڭىنا دەيىن قابىلداناتىنىن اتاپ ءوتتى.
ەسكە سالساق بۇعان دەيىن ءماجىلىس دەپۋتاتى رينات زايىتوۆ ۇشاققا دومبىرانى كىرگىزبەگەندەردى سىناپ تاستاعان ەدى. دەپۋتات مينيسترلىكتەن ۇشاققا ۇلتتىق اسپاپتاردى كىرگىزۋ ماسەلەسىن شەشىپ بەرۋدى تالاپ ەتتى.