استانانى باق- قالاعا اينالدىرۋدىڭ العاشقى ناتيجەلەرىنە بيىل قول جەتكىزۋ قاجەت - پرەزيدەنت
«جارتى جىل بۇرىن اكىمدىكتىڭ الدىنا 5 جىل ىشىندە استانانى باق- قالاعا اينالدىرۋ مىندەتىن قويدىم. بۇل باعىتتاعى ناقتى قادامدار ءالى دە جەتكىلىكسىز. ءسىزدىڭ كەڭەسشىڭىز بولىپ تاجىريبەلى مامان ەرلان نىسانبايەۆ بولىپ تاعايىندالدى. ول بۇل تاپسىرمانى شەشە الادى دەپ ۇمىتتەنەيىك. ەلوردانى اۋقىمدى كوگالداندىرۋ بويىنشا العاشقى ناقتى ناتيجەلەرگە بيىلعى جىلى قول جەتكىزۋ قاجەت»، - دەدى مەملەكەت باسشىسى.
بۇل رەتتە پرەزيدەنتتىڭ اتاپ وتۋىنشە، زاماناۋي تەحنولوگيالاردى قولدانۋ ماڭىزدى.
«ايتالىق، جاسىل جەلەكتەردى سۋارۋ ءالى كۇنگە دەيىن ەسكى ادىسپەن جۇزەگە اسىرىلادى. تامشىلاتىپ سۋارۋ قولدانىلمايدى. جۇمىس ادىستەرىن وزگەرتۋ كەرەك. ازىرگە وتە قىمبات باعالار بويىنشا شۇعىل ماۋسىمدىق جۇمىستارعا باسا نازار اۋدارىلادى، بۇل پروپورتسيونالدى ەمەس ۇلكەن بيۋدجەتتىك شىعىندارعا اكەلەدى. سونىمەن قاتار قالانىڭ سىرتقى كورىنىسىن رەتسىز جانە قىر سوڭىڭنان قالمايتىن جارنامالاردان تۋىنداعان «ۆيزۋالدى شۋ» دا ايتارلىقتاي بۇزادى. بۇل ماسەلە جەرگىلىكتى بيلىكتىڭ بيزنەس- قوعامداستىقپەن ەرەكشە نازار اۋدارۋىن جانە قاجىرلى ەڭبەگىن قاجەت ەتەدى. جالپى، ۇكىمەتكە اكىمدىكپەن بىرلەسىپ، ەلوردانىڭ كەلبەتى مەن اباتتاندىرۋ ماسەلەلەرىن رەتتەۋگە مۇمكىندىك بەرەتىن قاجەتتى نورمالار مەن ەرەجەلەردى ازىرلەۋدى تاپسىرامىن. سونىمەن قاتار استانانىڭ جاڭا باس جوسپارىندا قالا دامۋىنىڭ ءبىرتۇتاس جانە تەڭدەستىرىلگەن كوزقاراسىن ۇسىنۋ قاجەت»، - دەدى قاسىم- جومارت توقايەۆ.