پرەزيدەنت اكىمدىككە ەلوردادا بىرەگەي عيماراتتار سالۋ ءىسىن قولعا الۋدى تاپسىردى
«بۇعان دەيىن مەن ەسىل وزەنىنىڭ جاعالاۋىن، ەكسپو اۋماعىن جانە قالانىڭ باسقا دا اۋداندارىن اباتتاندىرۋدى تاپسىرعان ەدىم. بەدەلدى جەرگىلىكتى جانە الەمدىك ساراپشىلاردى، ۋربانيستەردى تارتا وتىرىپ، وسى باعىتتا جاڭا ۇسىنىستار ازىرلەۋ قاجەت. سونىمەن قاتار، ەلوردادا بىرەگەي نىسانداردى سالۋ توقتادى. كەرىسىنشە، تۇرعىن ءۇي قۇرىلىسىنا تىم كوپ كوڭىل ءبولىنىپ كەتتى. ءبىر كەزدەرى بيزنەس وكىلدەرىنىڭ قولداۋىمەن «ابۋ- دابي پلازا» ، «حان شاتىر» ، «Talan Towers» سياقتى كەشەندەر بوي كوتەردى. ولار بۇگىندە استانانىڭ سيمۆولىنا اينالدى. اكىمدىك وسى ءتاسىلدى قايتا قولدانىپ، قالادا جاڭا كورىكتى كەشەندەردى سالۋ ءۇشىن جەكە ينۆەستورلار مەن تانىمال ساۋلەتشىلەردى تارتۋى قاجەت»، - دەپ تاپسىرما جۇكتەدى مەملەكەت باسشىسى.
قاسىم- جومارت توقايەۆ قالا بەينەسى ءبىرىنشى كەزەكتە ەلدىڭ بەدەلىنە اسەر ەتەتىنىن باسا ايتتى.
«قالا قۇرىلىسى ەڭ الدىمەن ۇلكەن ونەر ەكەنىن جانە ونىڭ مەملەكەت بەدەلىنە اسەر ەتەتىنىن ەستە ۇستاعان ءجون. قازىرگى الەمدە سۇلۋلىق ومىرگە ۇيلەسىم سىيلاپ، قالانىڭ سيمۆولدىق كاپيتالىن ارتتىرادى، تالانتتار مەن ينۆەستيتسيا تارتۋعا ىقپال ەتەدى. سونىمەن قاتار، زاماناۋي ءساندى ءارى تارتىمدى عيماراتتار مەن ويلاستىرىلىپ جاسالعان كوشەلەر، اباتتاندىرىلعان اۋلالار قالا تۇرعىندارىنىڭ ءومىر ءسۇرۋ ساپاسىنىڭ اجىراماس بولىگى سانالادى»، - دەپ مالەم ەتتى پرەزيدەنت.