استانادا بالانى مەكتەپكە نەمەسە بالاباقشاعا ورنالاستىرۋ ءالى دە وزەكتى ماسەلە بولىپ وتىر - توقايەۆ
«ساپالى ءبىلىم بەرۋ قىزمەتىنىڭ قولجەتىمدى بولۋى اسا ماڭىزدى. استانادا بالانى مەكتەپكە نەمەسە بالاباقشاعا ورنالاستىرۋ ءالى دە وزەكتى ماسەلە بولىپ وتىر. كوپتەگەن مەكتەپتە وقۋشىلار سانى جوسپارلى مەجەدەن ارتىق. شىن مانىندە، ءۇش اۋىسىمدى وقىتۋ جۇيەسى ساقتالىپ وتىر. بۇعان جول بەرۋگە بولمايدى. قالادا جاڭا ءبىلىم بەرۋ مەكەمەلەرىنىڭ قۇرىلىسىنا باسىمدىق بەرۋ قاجەت. سونداي-اق 15 قوسىمشا ءبىلىم بەرۋ نىسانىن سالۋ كەرەك»، - دەدى پرەزيدەنتى.
مەملەكەت باسشىسى سوزىندە استانادا بىلىكتى ۇستازداردىڭ تاپشىلىعى ەرەكشە سەزىلىپ وتىرعاندىعىن اتاپ ءوتتى.
«جىل سايىن ءبىر مىڭعا جۋىق ءمۇعالىم جەتىسپەي جاتادى. سوندىقتان، ەلوردادا پەداگوگيكالىق جوعارى وقۋ ورنىن اشۋ تۋرالى ۇسىنىستى قولدايمىن. بۇل - دەر كەزىندە كوتەرىلگەن باستاما. سول ارقىلى سالىنىپ جاتقان مەكتەپتەرگە قاجەتتى ماماندار دايارلاۋعا مۇمكىندىك تۋادى. ۇكىمەت پەداگوگيكالىق وقۋ ورنىن اشۋدى جانە كوپبەيىندى اۋرۋحانا سالۋدى مۇقيات پىسىقتاۋى قاجەت. قاراجات ماسەلەسىن شەشۋ كەرەك. ادىلەتتى قوعامدى قۇرۋ ءۇشىن، ەڭ الدىمەن، وسكەلەڭ ۇرپاقتىڭ جان-جاقتى، تولىققاندى دامۋىن قامتاماسىز ەتۋ ماڭىزدى. سوندىقتان مەكتەپتەردەگى ءبىلىم بەرۋ ءىسى بالالاردىڭ الەۋمەتتىك جاعدايىنا قاراماستان، ينكليۋزيۆتى ءارى بارلىق بالا ءۇشىن قولجەتىمدى بولۋعا ءتيىس»، - دەدى قاسىم-جومارت توقايەۆ.
وسىعان دەيىن ول ەلوردانى سۋمەن قامتاماسىز ەتۋ ماسەلەسىن كوتەرگەنىن جازدىق.