قيسىق سۇراق، قىڭىر جاۋاپ
- جالعاننان كىم قالاي وتەدى؟
- ۇرىسى ۇرلاپ، جەمقورى جىرعاپ، وتىرىكشى جىرلاپ، كەدەيدىڭ ەرنى كەبىرسىپ، تاڭدايى قۇرعاپ، كەيبىرەۋ دەمدە بايىپ، الدە بىرەۋ وقىستان وڭباي تايىپ وتە شىعادى.
- ولمەيتىن تاقىرىپ بولا ما؟
- بولادى. ول جاقسىلىق پەن جاماندىق. سول ەكەۋى زاماناقىرعا دەيىن شايقاسىپ، تالتىرەكتەپ ءتىرى بارادى. قايسىسى جەڭەرىن وزدەرى بىلەدى.
- تۇگەنشە تەرگەۋدە وتىر. قىلمىستىق ءىسى 90 تومنان استى دەيدى. ءبىر قاراساق، ول راقىمشىلىققا ىلىگىپ، بوستاندىقتا جۇرەدى. سوندا بۇل ءوزى قالاي بولادى؟
- 90 توم كىتاپقا كوتەرىڭكى قالاماقى السام، مەن دە تالايلارعا ريزا بولار ەدىم.
- دۇنيە ءبىر قيسىق جول بۇراڭداعان، - دەپتى باياعىدا-اق. سوندا بۇل جالعانىڭىزدىڭ جولى قاشان تۇزەلەدى؟
- ول ءۇشىن سايتاندى - پەرىشتە، ۇرىلاردى - ۇلاعاتتى ازامات جاساۋ كەرەك.
- قۇربىم جارناما بەرەيىن دەپ ءماتىن دايىنداپ قويدىم.
- نە دەپ جازدىڭ؟
- ماعان ۋاقىتشا كۇيەۋ كەرەك. ۇلتىنا، جاس شاماسىنا، بويىنا، ويىنا، تۇر-تۇرپاتىنا قارامايمىن. قالتاسى اقشالى بولسا بولدى دەپ.
ءجۇنىس قوقىش ۇلى
«ايقىن» گازەتىنەن