شاڭحايدا جاساندى ينتەللەكت بويىنشا دۇنيەجۇزىلىك كونفەرەنسيا ءوتتى
ايتۋلى شاراعا 400-دەن استام كومپانيا قاتىستى. ءبارى كوپشىلىككە وزدەرىنىڭ جاڭا ونىمدەرىن تانىستىردى. بۇل - GR-1 دەپ اتالاتىن ادام ءتارىزدى روبوت. بيىلدان باستاپ جاپپاي ساتىلىمعا شىعاتىن الەمدەگى العاشقى قۇلتەمىر. جوبا اۆتورلارىنىڭ ايتۋىنشا، جىل سوڭىنا 100 روبوت جاساۋ جوسپارلانعان.
زەن كوح، ستارتاپ قۇرىلتايشىسى:
- الداعى ۋاقىتتا GR-1 ءتۇرلى سالادا ادامدارعا كومەگىن تيگىزە الادى دەپ ۇمىتتەنەمىز. ويتكەنى وتىرىپ، تۇرادى. جۇگىرە الادى. مىسالى، ەگدە جاستاعى كىسىلەرگە كومەكشى بولۋعا ابدەن جارايدى.
كورمەدە كوپشىلىكتىڭ نازارىنا تاعى ءبىر ەرەكشە جوبا تانىستىرىلدى. ول - ءيت ءتارىزدى ءتورتاياقتى روبوت. قۇراستىرۋشى كومپانيا نەگىزىنەن تەك ءتورتاياقتى روبوتتار جاساۋعا باسىمدىق بەرگەن. ويتكەنى مۇنداي روبوتتار اۋىر جۇك كوتەرۋگە الدەقايدا يكەمدىرەك كەلەدى ەكەن.
شيان سياويۋي، ماركەتينگ جونىندەگى مەنەدجەر:
- پاترۋلدىك تەكسەرۋلەردەن بولەك، ءبىز بۇل روبوتتاردى اپاتتىق- قۇتقارۋ، جۇمىستارىندا، ءورت كەزىندە قولدانۋ جاعىن دا قاراستىرىپ جاتىرمىز. سونىمەن قاتار اۋاعا زياندى زاتتار تارالعان كەزدەردە قانشالىقتى ءتيىمدى بولاتىنى انىقتالىپ جاتىر.
شاڭحايدا روبوت قۇراستىرۋ سالاسى بۇگىندە كادىمگىدەي قارقىن العان. مىڭنان استام كومپانيا جۇمىس ىستەيدى. جاساندى ينتەللەكتىمەن اينالىساتىن ماماندار سانى دا جىل سايىن ارتىپ كەلىدى. بولجام بويىنشا، 2025 -جىلعا قاراي الىپ شاھاردا جاساندى اقىل يندۋسترياسى 60 ميلليارد دوللارعا دەيىن تابىس اكەلەدى. بۇل قازىرگى كورسەتكىشتەن 2 ەسە كوپ.
www.24.kz