ەندى م ءا م س اۋدارىمدارىن جەكە ەمحانالاردا ەمدەلۋ ءۇشىن دە پايدالانۋ مۇمكىندىگى ۇسىنىلماق
ءتيىستى باستاما اشىق ن ق ا پورتالىندا جاريالانعان «ق ر كەيبىر زاڭنامالىق اكتىلەرىنە باسەكەلەستىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسىنا رەتتەۋشى ساياساتتىڭ كونسۋلتاتيۆتىك قۇجاتىندا كوتەرىلگەن، دەپ حابارلايدى قازاقپارات ءتىلشىسى.
«بۇگىنگى تاڭدا مىندەتتى الەۋمەتتىك مەديتسينالىق ساقتاندىرۋ (م ءا م س) جۇيەسى ارقىلى كورسەتىلەتىن مەديتسينالىق قىزمەتتەرگە تاريفتەر از قارجىلاندىرىلادى. بۇل وسى قىزمەتتەردىڭ ساپاسىنان بايقالادى. وسىلايشا، حالىق نەعۇرلىم جەدەل جانە ساپالى ەم الۋ ماقساتىندا جەكە مەديتسينالىق ۇيىمدارعا جۇگىنەدى. الايدا، ولاردىڭ قۇنى مەملەكەتتىك ەمحانالارمەن سالىستىرعاندا 2-3 ەسە قىمبات. وسىعان قاراماستان، حالىق جەكە ەمحانالارعا بەلسەندى تۇردە جۇگىنەدى، بۇل رەتتە ازامات اي سايىن الەۋمەتتىك مەديتسينالىق ساقتاندىرۋ قورىنا (ءا م س ق) اۋدارىلاتىن قاراجاتىن پايدالانا المايدى. وسىعان بايلانىستى، حالىققا ءوزىنىڭ الەۋمەتتىك اۋدارىمدارىن پايدالانۋعا مۇمكىندىك بەرۋ ماقساتىندا جەكە ەمحانالارداعى مەديتسينالىق قىزمەتتەرگە بىرلەسىپ تولەۋ تەتىگىن ەنگىزۋ قاجەت. وسىلايشا، حالىققا مەديتسينالىق قىزمەتتەر ءۇشىن ايىرماشىلىقتى قوسىمشا تولەۋگە مۇمكىندىك بەرىلەدى»، - دەلىنگەن قۇجاتتا.
باسەكەلەستىكتى قورعاۋ جانە دامىتۋ اگەنتتىگىنىڭ مالىمەتىنشە، مۇنداي جۇيەنى ەنگىزۋ ازاماتتاردىڭ ساپالى قىزمەت الۋىنا جانە جەكە مەديتسينالىق ەمحانالاردىڭ دامۋى مەن كەڭەيۋىنە ىقپال ەتپەك.