ۇلتتىق جوبا بويىنشا سالىناتىن «جايلى مەكتەپتىڭ» سانى قىسقارۋى مۇمكىن
الايدا، بۇرىن بەكىتىلگەن ءتيىستى ۇكىمەت قاۋلىسىنا وزگەرىس ەنگىزىلىپ، ءبىلىم وردالارىنىڭ سانى 33 كە ازايىپ، ەندى ەل بويىنشا جالپى سانى 368 مەكتەپ سالىنادى، دەپ حابارلايدى قازاقپارات ءتىلشىسى.
«ۇكىمەت 2022 -جىلى ءبىلىم بەرۋ ينفراقۇرىلىمىن قولداۋ قورىن قۇردى. اتالعان قوردىڭ قاراجاتى مەكتەپ قۇرىلىسىنا جۇمسالادى. 2023 -جىلعى 1-ماۋسىمداعى جاعداي بويىنشا قور قاراجاتى ەسەبىنەن 96,5 ميلليارد تەڭگە سوماعا 78 مىڭ وقۋشى ورنىنا (ەكى اۋىسىمدا) 61 مەكتەپ سالۋ ءىسى قارجىلاندىرىلدى. بيۋدجەت قاراجاتىن ۇتىمدى جانە ءتيىمدى پايدالانۋ ماقساتىندا وقۋ-اعارتۋ مينيسترلىگى وڭىرلەردىڭ اكىمدىكتەرىمەن بىرلەسىپ، اپاتتى وبەكتىلەردى جويۋ، ءۇش اۋىسىمدىق وقىتۋ جانە ورتا ءبىلىم بەرۋ ۇيىمدارىندا وقۋشى ورىندارىنىڭ تاپشىلىعى ءۇشىن وڭىرلەر بولىنىسىندە جاڭا وقۋشى ورىندارىن ەنگىزۋ بويىنشا قاجەتتىلىككە قايتا تالداۋ جۇرگىزدى. ق ر پرەمەر- ءمينيسترىنىڭ ورىنباسارى رومان سكلياردىڭ توراعالىعىمەن وتكەن 2023 -جىلعى 17-ساۋىردەگى جيىندا مەكتەپتەر سانىن قىسقارتۋ جانە قۇرىلىسقا جوسپارلانعان مەكتەپتەردىڭ جوبالىق قۋاتىن وڭتايلاندىرۋ جولىمەن «جايلى مەكتەپ» ۇلتتىق جوباسى شەڭبەرىندە ەنگىزىلەتىن وقۋشى ورىندارىنىڭ سانىن وڭتايلاندىرۋ بويىنشا جۇمىس جۇرگىزۋ تاپسىرىلدى»، - دەپ جازىلعان وزگەرىس ەنگىزىلگەلى وتىرعان ۇكىمەت قاۋلىسىنىڭ- جوباسىندا.
وسىعان بايلانىستى، ۇلتتىق جوبا اياسىندا سالىناتىن ءبىلىم وردالارى مەن قاراجات كولەمى قىسقارۋى مۇمكىن.
«ۇلتتىق جوبا اياسىندا سالىنىپ جاتقان نىساندار سانى 368 مەكتەپتى قۇرايدى. جالپى، بەكىتىلگەن ۇلتتىق جوبادا - 401 مەكتەپ. ياعني، ولاردىڭ سانىن 33 مەكتەپكە ازايتۋ كوزدەلگەن. ال، ۇلتتىق جوباعا ساي ايقىندالعان ەكى اۋىسىمدا وقيتىن مەكتەپتەردەگى 842 مىڭ وقۋشى ورنىن 104 مىڭعا ازايتىپ، 738,2 مىڭ وقۋشى ورنىنا ارناپ بەكىتۋ ۇسىنىلادى. ۇلتتىق جوبانى ىسكە اسىرۋعا ارنالعان بيۋدجەت شىعىستارىنىڭ كولەمى 2606596055000 تەڭگە بولىپ بەكىتىلگەن. ەندى ول 61,8 ميلليارد تەڭگەگە تومەندەپ، 2544789842000 تەڭگە بولادى» ، - دەلىنگەن قاۋلىدا.