جەتىسۋ وبلىسىندا قاتتى جاۋىن كوپىردى شايىپ كەتتى

تالدىقورعان. قازاقپارات - جەتىسۋ وبلىسىندا قاتتى جاۋىن كوپىردى شايىپ كەتتى، دەپ حابارلايدى قازاقپارات ءتىلشىسى.

«9-شىلدە ساعات 19:41-دە جەتىسۋ وبلىسى كەربۇلاق اۋدانىندا وبلىستىق ماڭىزى بار «قاراشوقى - سارىوزەك» اۆتوجولىندا جاۋىن-شاشىننىڭ مول ءتۇسۋى سالدارىنان اعىن پايدا بولدى. ول تابيعي قۋىس بويىنشا جوعارىدا اتالعان اۆتوجولعا تىرەلىپ، الدىن الا اقپارات بويىنشا 2 جەردە ورناتىلعان قۇبىرلى وتكەلدەردى شايعان (ديامەترى 0,75 قۇبىرلى وتكەلدەر سۋ كولەمىنە توتەپ بەرە الماعان)»، - دەلىنگەن جەتىسۋ وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ حابارلاماسىندا.

وقيعادان زارداپ شەككەندەر مەن قازا تاپقاندار جوق. قازىر جاڭبىر توقتاپ، سۋ دەڭگەيى تومەندەدى.

وقيعا ورنىندا جەرگىلىكتى اتقارۋشى ورگانداردىڭ، پوليتسيانىڭ، توتەنشە جاعدايلار ورگاندارىنىڭ كۇشتەرى مەن قۇرالدارى جۇمىس اتقارىپ جاتىر. اينالما جول بار. پوليتسيا قىزمەتكەرلەرى قاۋىپسىزدىك بەكەتتەرىن قويدى.