قوشقار كوتەرۋدەن رەكورد جاساعان ازامات ماقۇلبەكوۆ «تولاعاي» الىپتار سايىسىندا جەڭىمپاز اتاندى
قالا اكىمدىگىنىڭ الدىنداعى ورتالىق الاڭعا ءتورت كيىز ءۇي تىگىلىپ، ورتاسىنا شاعىن ساحنا ورناتىلىپتى. بويىنداعى بۇلا كۇشكە سەنگەن 15 ازامات سول كيىز ۇيلەردەن جۇرت نازارىن تىككەن سايىس اۋماعىنا كەزەك- كەزەك شىعىپ جاتتى.
ۇمىتكەرلەر اراسىندا قونايەۆ قالاسىنان كەلگەن پاۋەرليفتينگ شەبەرى دە، ارىس قالاسىنان كەلگەن قازاق كۇرەسىنىڭ بالۋانى دا، بەلبەۋ كۇرەسىنەن الەم چەمپيونى دا، اقتوبەدەن كەلگەن قويىن- قولتىق ۇرىس شەبەرى دە، زىلتەمىر كوتەرىپ جۇرگەن كانىگى اۋىر اتلەت تە، گرەك- ريم كۇرەسىنىڭ مايتالماندارى دا بولدى.
«تولاعاي» الىپتار بايقاۋى جوباسىنىڭ اۆتورى تەمىر سىپاتايدىڭ ايتۋىنشا، مۇنداي رەسپۋبليكالىق دەڭگەيدەگى تۋرنير وسىمەن ءتورتىنشى رەت ءوتىپ وتىر.
«بۇل جولعى بايقاۋدى استانانىڭ 25 جىلدىعىنا ورايلاستىرىپ، قالانىڭ اشىق ءتۋرنيرى رەتىندە وتكىزىپ وتىرمىز. مۇندا باق سىناۋشىلاردىڭ اراسىندا كانىگى سپورت شەبەرلەرى دە، بازاردا اربا سۇيرەپ جۇرگەن قارا كۇش يەلەرى دە بار. جوبانىڭ ماقساتى - قاجىمۇقاننىڭ بۇگىنگى ءىزباسارلارىن ەلگە پاش ەتىپ، بۇقارالىق سپورتتى ناسيحاتتاۋ. سايىستىڭ ءبىرىنشى ورىن يەگەرىنە 1 ميلليون تەڭگە سىياقى بەرىلەدى. قالعان جۇلدەگەرلەرگە دە اقشالاي سىيلىق بار. ونىڭ ءبارىن استانا قالاسىنىڭ اكىمدىگى ۇسىنىپ وتىر. سونداي- اق، «چەمپيون» برەندىنىڭ نەگىزىن قالاۋشى سەرىك بايجانوۆ تا دەمەۋشىلىك قولداۋ ءبىلدىردى. وسى بايقاۋدا توپ جارعان باۋىرلارىمىزدى كەلەشەكتە الەمدىك دەڭگەيدەگى الىپتار سايىسىنا اپارساق دەگەن ارمانىمىز بار»، - دەيدى ول.
سايىس بەس كەزەڭدە ءوتتى. ءبىرىنشى كەزەڭدە الىپتار 141 كەلى تاستى 1 مينۋتتىڭ ىشىندە مەيلىنشە ۇزاق جەرگە كوتەرىپ جەتكىزۋ كەرەك بولدى. ودان كەيىن ۇمىتكەرلەر سالماعى 10 كەلى نايزانى الىسقا لاقتىرىپ سايىستى. ءۇشىنشى كەزەڭدە ۇزىندىعى 1,5 مەترلىك تەمىر بىلەۋدى جەلكەگە سالىپ يۋدەن كۇش سىناستى. بۇدان كەيىن الىپ كۇش يەلەرى سالماعى 130 كەلى بولاتىن بورەنەنى كوتەرىپ، وتىرىپ- تۇرۋدان باق سىنادى. اقىرعى كەزەڭدە اپايتوس جىگىتتەرگە ۇستىنە 500 كەلى جۇك ارتىلعان اربانى قۇم توسەلگەن جولمەن 30 مەتر قاشىقتىققا بارىنشا جىلدام جاياۋ سۇيرەپ اپارۋ كەرەك بولدى.
بەس سايىستىڭ قورىتىندىسى بويىنشا 120 ۇپاي جيناعان شىمكەنتتىك نۇرعيسا ادىلەت ۇلى ءۇشىنشى ورىن يەلەندى. ەكىنشى ورىن بەس كەزەڭدە جيىنى 122 ۇپاي يەلەنگەن قونايەۆ قالاسىنىڭ سپورتشىسى ۆايد تەڭىزبايەۆقا بۇيىردى. ال جارىس جەڭىمپازى اتانعان ازامات ماقۇلبەكوۆتىڭ ەنشىسىندە بەس كەزەڭنىڭ قورىتىندىسى بويىنشا 132 ۇپاي بولدى. جەڭىمپازعا «تولاي» الىپتار سايىسىنىڭ جەڭىمپازىنا بەرىلەتىن التىن بەلبەۋمەن بىرگە 1 ميلليون تەڭگەنىڭ سىياقىسى تابىستالدى.
ەسكە سالساق، جۋىقتا عانا ازامات ماقۇلبەكوۆ قوشقاردى 3555 رەت كوتەرىپ، قازاقستاننىڭ رەكوردتار كىتابىنا ەنگەن بولاتىن.