تۇرمىستىق زورلىق- زومبىلىق ءۇشىن جازا كۇشەيتىلدى

استانا. قازاقپارات – ق ر ءى ءى م اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقمارال سەرىكبايەۆا زورلىق- زومبىلىق زاڭناماسىنداعى وزگەرىستەردى ايتىپ بەردى، دەپ حابارلايدى قازاقپارات.

2022 -جىلدىڭ قىركۇيەگىندە پرەزيدەنت قازاقستان حالقىنا جولداۋىندا تۇرمىستىق زورلىق- زومبىلىق جاساۋ فاكتىلەرى ءۇشىن جاۋاپكەرشىلىكتى قاتاڭداتۋ جونىندە تاپسىرما بەرگەن ەدى.

1-شىلدەدەن باستاپ قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە تۇزەتۋلەر زاڭدى كۇشىنە ەندى.

«تاجىريبە كورسەتىپ وتىرعانداي، جابىرلەنۋشىلەر ومىرىنە نەمەسە دەنساۋلىعىنا قاۋىپ تونگەندە پوليتسياعا جۇگىنەدى، ال پوليتسيا قىزمەتكەرلەرى كەلگەندە اگرەسسورلارعا ارىز جازۋدان باس تارتادى. كوبىنەسە پوليتسيا كەتكەن سوڭ وتباسىنداعى جانجال ءارى قاراي ۋشىعىپ، كەيدە بۇل اۋىر زارداپتارعا اكەلىپ سوعادى. وسىعان بايلانىستى، ەندى تۇرمىستىق جانجال تۋرالى حابارلاما تۇسكەندە پوليتسەيلەر سول جەردە بولعان وقيعاعا قۇقىقتىق باعا بەرەدى. حاتتاما جاساۋ ءۇشىن كۋاگەرلەردىڭ، كورشىلەردىڭ ايعاقتارى، بەينەباقىلاۋ كامەرالارى مەن پوليتسەيلەردىڭ وزدەرىنىڭ بەينەتىركەگىش جازبالارى جەتكىلىكتى بولادى. سوڭعى شەشىمدى سوت قابىلدايدى» ، - دەدى ا. سەرىكبايەۆا مينيسترلىكتە وتكەن ونلاين بريفينگىدە.

مىسالى، ايەل وتباسىلىق جانجال بويىنشا قوڭىراۋ شالسا، پوليتسيا كەلگەندە شيەلەنىس شەشىلىپ، ەر ادام ءوزىنىڭ زاڭسىز ارەكەتىن توقتاتا قويادى. ءوز كەزەگىندە، ايەل ارىز جازۋدان باس تارتادى، ءبىراق وزىنە قاتىستى قۇقىقبۇزۋشىلىق جاسالعانىن ءتۇسىندىرىپ ايتادى. ونىڭ ايعاقتارىنا سۇيەنە وتىرىپ، قۇقىق بۇزۋشىعا قاتىستى اكىمشىلىك قۇقىقبۇزۋشىلىق ىستەرى بويىنشا ءىس جۇرگىزۋدى قامتاماسىز ەتۋ شارالارى قابىلداناتىن بولادى (ا ق ب ت ك 785-بابى) . ولار: بارلىق ايعاقتاردى قاراپ تەكسەرۋ، بولىمشەگە جەتكىزۋ، اكىمشىلىك ۇستاۋ، مەديتسينالىق كۋالاندىرۋ جانە تاعى باسقالار.

«سوتتا قۇقىق بۇزۋشىنىڭ جابىرلەنۋشىمەن تاتۋلاسۋ مۇمكىندىگى بار، ءبىراق سوڭعى وزگەرتۋلەر بويىنشا تەك ءبىر رەت قانا تاتۋلاسا الادى. ياعني وتباسىلىق جانجال جاساۋشى ءبىرىنشى رەت سوتتا جابىرلەنۋشىمەن تاتۋلاسسا، بۇل ارەكەتتەرى كەلەسى قايتالانعاندا ولاردى تاتۋلاستىرۋعا سوتتىڭ زاڭ بويىنشا قۇقىعى جوق. وتباسىلىق جانجال ءۇشىن اگرەسسورعا ەسكەرتۋ جاسالادى نەمەسە 5 تاۋلىككە قاماۋعا الىنادى.

قايتا جاسالعان جاعدايدا - 10 تاۋلىك قاماۋعا الۋ، ۇرىپ- سوعۋ فاكتىسى ءۇشىن - 10 تاۋلىك قاماۋعا الۋ، قايتالانسا - 20 تاۋلىككە قاماۋ كوزدەلگەن»، - دەدى سپيكەر.

دەنساۋلىققا جەڭىل زيان كەلتىرگەنى ءۇشىن - 15 تاۋلىك، ال قايتالانسا 25 تاۋلىككە قاماۋ جازاسى بار.

«سونىمەن قاتار قازىرگى ۋاقىتتا تۇرمىستىق زورلىق- زومبىلىق جاساۋ فاكتىلەرى ءۇشىن قوعامدىق جۇمىستاردى تاعايىنداۋ ماسەلەسى پىسىقتالۋدا. بۇل زارداپ شەككەندەرگە پسيحولوگيالىق قىسىمدى ازايتۋعا مۇمكىندىك بەرەدى»، - دەدى ا. سەرىكبايەۆا.