القابەكتە تۋعان الىپ سەرىك قوجاباي ۇلى
سول كەزدە التاي گازەتى، شينجياڭ گازەتى، شينجياڭ حالىق راديوسى ارت-ارتىنان التاي گازەتىندەگى نۇسقاسى بويىنشا جاريالادى. دەسەدە بۇل نۇسقانىڭ وزگەرىسكە ۇشىراپ، قىسقارتىلعانىن ايتا كەتۋگە دە ءتيىسپىن. ەسكى جازبالارىمدى رەتتەپ وتىرىپ، سول گازەتتى تاۋىپ الدىم. ەندى سونى سىزدەردىڭ نازارلارىڭىزعا جولداپ وتىرمىن.
القابەكتە تۋعان الىپ
(وچەرك)
الەمگە ايگىلى اق يىق بالۋان سەرىك قوجاباي ۇلىنىڭ ۇيىنە كىرىپ بارعانىمدا بايپاقشاڭ كۇيىندە تابانىن پەشكە توسەپ تەمىر توسەكتە 5 جاسار ۇلى قۋانىشتى كەۋدەسىنە مىنگىزىپ الىپ ويناتىپ وتىر ەكەن. سالەم بەرگەن داۋىسىمنان جالت قارادى دا بالانى قۇشاقتاي ورنىنان تۇردى. ءبىزدىڭ ەلگە كۇيەۋ بولۋشى ەدى، جەزدەلىگىن بۇلدادى بىلەم:
- اتىڭ جاڭا جەتتى مە؟ - دەدى وكپەسىن بۇكپەي، باسىنداعى كەپەشتەپ وراعان كوك تورعىن شىتپەن كوز اياسىن سۇرتۋىنەن كوكەيىندەگى كومەسكى ويدى ايتقىزباي ءبىلدىم. جوقشىلىققا جاسىپ، توقشىلىققا تاسىپ كورمەگەن تاۋ تۇلعالى قايسار ازاماتتىڭ ەگىلگەن كوڭىل-كۇيىن كورگەندە مەنىڭ دە بەت-بەينەم جاۋاتىن كۇندەي بۇزىلا قالدى...
توسەك تارتىپ جاتقانىنا ەكى ايدىڭ ءجۇزى بولعان بالۋان كوزى شۇڭىرەيىپ، جاعى سۋالىپ ەداۋىر ويازداپتى. اۋداندىق جۇقپالى اۋرۋلاردىڭ الدىن الۋ پۋنكتىندەگى دارىگەر ورىنبايدىڭ ايعا تارتا ارناۋلى قاراۋىندا اۋرۋدىڭ سالماعى قايتقانىمەن ءالى دە ىلگىش بارلىعى سارعايعان وڭىنەن، سىنىڭقى قاباعىنان كورىنىپ تۇر...
سەرىك قالجىڭعا كودەك، سوزگە ءارى دوعال، ءارى ساعىز ادام. نەگە ەكەنى بەيمالىم، ءوز باسى تۋرالى ايتۋدان ات بويىن الا قاشادى. تالاي رەت داستارقان ۇستىندەگى قىسىر كەڭەستە انشەيىن ءسوزسىراڭعىسى قىپ تامىرىن تارتقام. سونداعى بار ايتقانى:
- كۇرەستىك، جىقتىق كۇش-قۋاتتىڭ تولىق ۋاعىندا، - دەدى بەيعام عانا. ول جاعىنا بۇگىن دە باساتىن ەمەس.
دەسە دە سەرىكتىڭ بۇگىنگە شىندىق، ەرتەڭگە اڭىز بولاتىن ىستەرى كەن شاحتالارىندا، جىلقىشى قوسى، قويشى قوتانىندا، ساۋىق كەشتەرىندە جىر بولىپ ايتىلعانىن سان ەستىگەم.
***
1937 -جىلى سەنتيابردىڭ سوڭى. ءتۇرتىپ السا كورمەيتىن جەتى قاراڭعى ءتۇن. مەڭىرەۋ اسپان كوزىن سىعىمداپ تۇر. بۇلتتار شوعىرىن الدىنا سالىپ ىسقىرتا قۋعان جەل القابەكتىڭ شۇلەنباي دەپ اتالاتىن تۇبەگىندەگى شاعىن اۋىلدىڭ ىرگەسىنەن ءۇرىپ تۇر. اۋىلدىڭ شەتىندەگى قارا كۇركەدە ءۇمىتىن قۇرعا، جانىن قۇدايعا تاپسىرعان ايەلدى اشتى تولعاق قىسقانىنا 3 كۇن بولدى. تاعاتى تاۋسىلىپ امالدان تارىققان اۋىل ايەلدەرى:
- بەكەر-اق جولاۋشىلاعان، ءاسىلى تولعاق ەرىمەن ەرىپ كەتكەن، - دەپ ىرىمداستى. تاعدىردىڭ كەيدە ادامدى ەركىنەن تىس ءدۇدامال سەنىمگە شىرماپ ءشۇبالاندىراتىنى دا قىزىق. شيرىققان تولعاقتى مال اياعىمەن ورىسكە كەتىرگىسى كەلمەگەن جارىس قازان شايىن ەندى ىشە بەرگەندە، شىنىندا قوجابايدىڭ كەلۋىن كۇتىپ تۇرعانداي-اق تاڭ بەلگىسىمەن بىرگە بالا دا جەرگە ءتۇسىپ، بەبەۋلەگەن انا جانى تەرەزە تاپتى.
- ۇل ەكەن! ءسۇيىنشى!
قوجاباي ەركوڭىل، ەتى ءتىرى، جومارت جان ەدى.
- باي بوپ كورگەم جوق، كەدەي بوپ ولگەم جوق. الا اناۋ استىمداعى اقتانكەردى، ەكى سيىردىڭ قاي سەمىزىن شىلدەحاناعا ارنادىم، دەدى ەشتەڭەسىن اياعىسى كەلمەگەن اكە شىن نيەتىمەن اعىنان اقتارىلىپ. ءسويتىپ قاراشا ءۇي شۇلەن باقىتقا شومىپ، دابىرى دارداي دىر-دۋمان توي جاسادى. قارتايعاندا وزىمە سۇيەۋ بولسىن دەپ اتىن سەرىك قويدى.
قاي بالاعا دا مەيلى قانداي بولسا دا ءوز اكەسى اسقار تاۋ، قورمال پانا عوي. جالعىزىمدى ادام ساناتىنا قوسىپ، قىزىعىن كورسەم دەپ ارمانداعان اكە تىلەگىنە جەتە المادى. ارداقتى اكەسىنەن 8 جاسىندا ايىرىلعان سەرىك جەتىمدىك سورى ماڭدايىنا شور-شور قاتىپ شىرىلداپ قالا بەردى...
انا مەن بالانىڭ ەندىگى كۇن كورىسى قيىنداي باستادى. از عانا مالدىڭ بىرنەشە باسىن قۇدايدىڭ قۇدىعى موللا قۇران-قاتىم اقىسىنا سىپىردى دا، قالعانىن «قوجابايدىڭ كوزىندەي كورىپ جۇرەمىز» دەپ وزدەرىنشە سۇيەكتى كىسىمسىگەن جەگجات اعايىندار تونادى. ەندى ولارعا پانا بولارلىق جاناشىر بولمادى. ءار اعاشتىڭ جاپىراعى وزىنە عانا كورىك بولادى، باسپاناسىز قالعان جەسىر مەن جەتىمدى ايانىشتى تىرلىك يتپەكتەي بەردى.
اعايىنعا ءىس تۇسپەك،
ول ءبىر ۇلكەن قارعىس قوي.
الاتىنىڭ ەڭ كۇشتەپ،
بەيشارا مەن بايعۇس قوي! - دەپ دانىشپان ابايدىڭ زارلاپ وتكەنىندەي قوجابايدىڭ بار كۇنىندە ەسىك بەرمەيتىن اعايىنسىماقتار بۇلتتى كۇنگى كولەڭكەدەي عايىپ بولدى.
- بىزدەن قايىر جوق، ءوز قوتىرلارىڭدى وزدەرىڭ قاسىپ كۇن كورىڭدەر، - دەپ ماڭايلارىنا جولاتپاي ات بويىن الا قاشتى. اقىرى سورلى جەسىر جەتىمەگىن جەتەلەپ ەل اقتادى. سەرىكتىڭ شەشەسى ساقىمي ون ساۋساعىنان ونەر تامعان ءۇي شارۋاسىنا دا باپتاداي قاراجون مىقتى ايەل ەدى. بىرەۋدىڭ سىرماعىن سىرىپ، ويۋ باستى، بىرەۋدىڭ شۇيكەسىن سوزىپ ارقانىن ەستى. بىرەۋدىڭ مالىن ساۋىپ ىركىتىن ءپىستى. ال سەرىك بۇزاۋ، قوزى جايدى. 9 جاستاعى شاعىندا-اق اتپال ازاماتتىڭ قارۋىن كورسەتە باستادى. تۇيە تەڭ وتىندى ەشكىمنىڭ دەمەۋىنسىز-اق ارقاسىنا دىك ەتكىزىپ شىعارىپ، دەمالماي يىعىن دا اۋىستىرماي جەتىپ كەلەتىن.
جەلقوم جاستانىپ، تۋلاق توسەنىپ، قۇرىم كيىزگە ورانىپ قۇرت ورەسىنىڭ استىنا جاتاتىن، اقى-پۇل شىقپايتىن مۇنداي ارزان قارۋلى قولدان بايلار دا بەزبەدى. ءارقانداي باقىتسىزدىقتىڭ وزىنشە جۇبانىشى بولادى. انا مەن بالا ءبىر-بىرىنە قانداي مەدەۋ ەدى شىركىن! جۇمىستان قالجىراعان انا «قۇلىنىم» دەپ ۇلىنىڭ ماڭدايىنان ايمالاسا، سەرىك اپاسىنىڭ ومىراۋىنا تۇمسىعىن تىعىپ يسكەلەسە قايعى-قاسىرەت ۇمىتىلىپ كولدە جۇزگەن بالالى قازداي جادىراپ سەرگىپ قالاتىن. وسىنىڭ ءوزى عانيبەت ەدى-اۋ! وپاسىز جالعان مۇنى دا كوپسىندى. 1948-جىلى قىستا 11 جاستاعى سەرىك ىستىقتا كولەڭكە، ىزعاردا ىق بولعان شەشەسىنەن ايىرىلىپ جالعىز قالدى. ايتىپ تاۋىسقىسىز ازاپتى كەشىپ، قۇسالىق دەرتى قان جىلاتقان شەر كوكىرەك سەرىك ەشكىمگە قوسىلماي جالعىز ءجۇردى. بالا بولىپ ويىندى بىلمەدى. شەشەسىن، اكەسىن ويلاپ مۇڭايدى، جىلادى. موينىنداعى جەتىمدىك قامىتى اۋىر اجىرعىداي ەڭسەسىن ءتۇسىردى.
ءشيلى وزەككە بۇزاۋلاردى قايىرماقتاپ توبەشىككە وتىرىپ اكە-شەشەم اياق استىنان ءتىرىلىپ كەلە قالسا قانداي جاقسى بولار ەدى دەگەن قيالداعى سەرىكتىڭ ويىن بايگە توبەگە توپتانعان قالىڭ ادامنىڭ ۋ-شۋى اۋدارىپ اكەتتى دە، سولاي بەتتەدى. بۇل القابەكتەگى ارعى بەت، بەرگى بەتكە اتاعى جايىلعان قامزا اقساقالدىڭ اسى بولاتىن. بۇل وسى وڭىردەگى ەڭ سالتاناتتى ءارى ەڭ سوڭعى اس ەدى. بايگە شاۋىپ، بالۋان ءتۇسىپ جاتقان.
باسقارۋشى:
- ەندى كىمىڭ بار كۇرەسەتىن، - دەدى داۋىستاپ. ەشكىم شىعا قويمادى.
ورتاداعى جىگىت وسى وڭىرگە بەلگىلى باس بالۋان ونەرحان ەدى.
بار ىنتاسى كۇرەسۋگە اۋعان سەرىك:
- مەن كۇرەسەمىن، - دەپ ايعايلاپ جىبەرگەنىن ءوزى دە سەزبەي قالدى. جۇرت داۋىس شىققان جاققا قاراسا قالدى. سام-سام كون شالبار، قىرىق شوقپىت تون، كەزدەي قومىت پيما، دال-دۇل جاۋتىك تىماق كيگەن، بەلىن ايىلدىڭ ۇزىگىمەن بايلاعان قارا بالا ەكەن. ءوز قۇرالىپتاستارىنان دەنەلى سەرىكتىڭ كەسەك تۇلعاسىنا قاراپ 17 جاستاردا دەپ مەجەلەۋگە بولاتىنداي ەدى. ءبىراق ول 12 جاستا عانا بولاتىن.
ونەرحان قوزىعا تيگەن قاسقىرداي سەرىككە تاپ بەرىپ، قاپسىرا قۇشاقتاپ باسىنان اسىرىپ لاقتىرماقشى بولىپ ەدى، جىلجىتا المادى. اش بەلدەن قىسا تۇسكەن سەرىك تە وسال جاۋ ەمەستىگىن اڭعارتتى. ءارى ەكەۋىن دە نامىس اكەتىپ بارادى. بىردە جۇلقىسىپ، بىردە تەكەشە تىرەسىپ تۇرا قالادى. ءبىر كەزدە وڭتايلى ءساتتى كۇتكەن سەرىك ءۇيىرىپ-ءۇيىرىپ مىقىنعا كەلتىردى دە اساۋ جامباسقا الىپ شارق ەتكىزدى. كوزىنىڭ وتى جارق ەتىپ جەر سۇزە جىعىلعان بالۋان باسىن زورعا كوتەرىپ ورنىنان تۇرا بەرگەندە، سەرىك ونى قايتا ءبىر رەت جەرگە نىعارلاپ:
- بايقاپ ءجۇر، بۇدان بىلاي - دەدى كوزىنەن ۇشقىن اتىپ.
ەل ءىشى گۋ-گۋ.
- ناعاشىسى اققىز دەيتىن ادام اتان تۇيەنى كوتەرگەن ارىس ەدى، سوعان تارتقان عوي مىناۋ.
- انا بيعۇس جامان جىعىلدى عوي، سىنىقتان ساۋ ما ءوزى؟
- قارۋىڭدى كىسى ەسىگىندە قور قىلما بالام، ءجۇر مەنىڭ ۇيىمە! - بوتاش دەيتىن اقساقال سەرىكتى مىنگەستىرگەن كۇيى ۇيىنە اپاردى.
اۋىر كۇندەر سەرىكتى اقىلدى دا قايسار، قاجىرلى دا ەڭبەكشىل ەتىپ شىنىقتىردى.
العىر جاس كەشكى مەكتەپتەن ساۋاتىن اشىپ، بالا بولسا دا اۋىلداعى ناۋقانعا اتسالىسىپ ۇگىتشى- جارشى قولقانات بولدى. 1956-جىلى اقەدىل اقساقال بوتاش كەيبىر دۇنيەقورلارشا قالىڭمالعا قىزىقپاي «تەڭىن تاۋىپ تەگىن بەر» دەگەندەي قىزى ءماريانى سەرىككە ۇيلەندىردى. باسىنا ءۇي تىگىپ، باۋىرىنا قازان اسىپ، قوجابايدىڭ وشكەن ءتۇتىنىن قايتا بۋداقتاتتى.
سەرىك 1957 -جىلى جازدا شاعىن اۋىلدىڭ باستىعى بولىپ سايلاندى. وسى جىلدىڭ كۇزىندە مەملەكەتكە استىق تاپسىرىپ جاتقان بولاتىن. قويتاسشا ۇيىلگەن سارى داعارلار القابەكتەگى تاڭ مەكتەبىنىڭ اۋلاسىندا استىق شوقىسىنا اينالدى. بىرەۋى 100 كيلولىق ەكى داعاردى ءجۇن جاستىقشا ەكى قولتىعىنا قىسا سالعان سەرىك 30 مەتر بيىككە ءالسىن-ءالى شىعارىپ ءجۇردى. وتان ءۇشىن ايانباي توككەن تەر ونى داڭققا بولەۋدەن تىس، ادامداردى تاڭعالدىرعان الىپ كۇش ەڭبەك مايدانىنا تانىلا بەردى دە، 1958-جىلى اۆتونوميالى رايوندىق بالۋاندار كومانداسىنا شاقىرىلدى. زەرەك جاس حالىقاراشا، قىتايشا كۇرەس قاعيدالارىن وتە تەز يگەردى. ۇستازدارى بولاشاق بالۋاننان ۇلكەن ءۇمىت كۇتتى.
1959-جىلى 1-مامىر حالىقارالىق ەڭبەكشىلەر مەرەكەسى بايلانىسىمەن بەيجيڭدە وتكىزىلگەن بۇكىل مەملەكەتتىك بالۋاندار جۇلدە تالاسۋ جارىسىندا، مەملەكەتتىك اۋىر سالماق جۇلدەگەرلەرى ساندۇڭدىق لاي گا مەن ىشكى موڭعۇل بالۋانى سەنگىنى جىعىپ، مەملەكەتتىك اۋىر سالماقتىلار رەكوردىن بۇزىپ ماۋ زىدۇڭ، جۋ ىنلاي، حى لۇڭ قاتارلى پارتيا مەن ۇكىمەت باسشىلارىنىڭ قابىلداۋىندا بولىپ بىرلىكتە سۋرەتكە ءتۇستى. 1959-جىلى قىركۇيەكتە، وتان تويىنىڭ 10 جىلدىعىنا وراي شاڭحايدا سوۆەت وداعىنىڭ دۇنيەگە ايگىلى اۋىر سالماقتى بالۋانىمەن كۇرەستى. بۇل كورەرمەندەرگە قىزىق بولعانىمەن سەرىك ءۇشىن مەملەكەتتىڭ، قازاق ۇلتىنىڭ ابىرويىنا ساياتىن سىن ەدى. سوۆەت بالۋانى قىرقاي شالىپ جاۋىرىنانان تۇقىرتقاندا، سەكەڭ ىشتەن كىرىپ اشادان كوتەرىپ يىققا الدى دا جەرگە قويىپ كەتتى. سوندا ويىن كورىپ وتىرعان جۋ ىنلاي جولداس قازاق بالۋانىنا بولعان ماقتانىش ءارى ريزالىقپەن:
- تەمىر دىڭگەك، شىنىندا تەمىر دىڭگەك، - دەگەن ەكەن ورنىنان ۇشىپ تۇرىپ.
1960-جىلى شينجياڭ بالۋاندار كومانداسى شاندۇڭدا بولدى. بۇل سەكەڭنىڭ سوقىر ىشەك وپەراتسياسىن جاساتقانىنا 3 اي بولعان مەزگىل ەدى. قاعيدا بويىنشا كۇرەسۋگە بولمايتىن. ءبىراق ونىڭ ورنىن ەشكىم تولتىرا المادى. مۇندايدا تۇسپەسى ءتۇسىپ، ەرلەنىپ كەتەتىن ارشىل بالۋان قاراپ تۇرىپ ءوز كومانداسىنىڭ جۇلدەسىن بەرگىسى كەلمەدى. ناسيحاتقا كونبەي مايدانعا ءتۇستى. وزىنەن بۇرىنعى مەملەكەتتىك اۋىر سالماق جۇلدەگەرى لاي گا دا قارا كۇشتىڭ الىبى بولاتىن. استاناداعى كۇرەستە ۇتىلعانىنا وكىنگەن ول سەرىكپەن قايتا ءبىر ۇستاسۋدى ارمان ەتىپ تە جۇرگەن. ەكى جولبارىس اي-شايعا قاراماي جۇلقىسا كەتتى. وڭاي جىعىسار ەمەس. ۋاقىتتىڭ از قالعاندىعىن سۋديا تاقاقتاپ جاريالاپ تۇر. لاي گانى قاپسىرا قۇشاقتاپ، كوتەرمەكشى بولعاندا سەرىكتىڭ وپەراتسيا جاساتقان ءىشى سوگىلىپ كەتتى.
«ەردى نامىس، قوياندى قامىس ولتىرەدى»، مايداننان شەگىنۋ ولىمنەن قيىن. كوز الدى بۇلدىراپ، شاشى تىكىرەيىپ نە بولعانىن بىلمەدى. بار قايراتىن بويىنا جيىپ، بۇركىتشە ءشۇيىلدى دە قارسى جاقتى الىپ سوعىپ باۋىرىنا باستى. قولى ۇستاعان جەرىنەن ايىرىلماي قارىسىپ قالىپتى. تالىقسىپ كەتكەن ەكەن. ەمحانادا جاتقانىن ءبىر-اق ءبىلدى.
سەرىك ۇدايى 4 جىل مەملەكەتتىك اۋىر سالماقتىلار جۇلدەسىن بەرمەدى. وسىنىڭ ايعاعى رەتىندە كوكىرەگىندە 4 التىن مەدال جۇلدىزداي جارقىرادى. ءسويتىپ كەشەگى بوساعادان بويى اسپاعان جەتىم سالعان كۇيى مەملەكەت تورىنەن ءبىر-اق شىقتى.
قىتاي حالىق رەسپۋبليكاسىنىڭ دارا جۇلدەگەرى دەگەن التىن مەدالدى مارقۇم مارشال حى لۇڭ قوجاباي ۇلىنىڭ كەۋدەسىنە ءوز قولىمەن تاقتى. بۇل كەزدە اتاعى حالىقاراعا جايىلعان سەرىك «قىتايدىڭ قاجىمۇقانى» دەلىنىپ شەتەل گازەت-جۋرنالدارىندا تانىستىرىلىپ جاتقان بولاتىن...
1962-جىلى شينجياڭ بالۋاندار كومانداسى تاراتىلدى. ۇرىمجىدەگى زاۆودتاردىڭ بىرىنە جۇمىسشى بولۋدان گورى «ەردىڭ ءسانى ەلى» دەگەندەي، التىن بەسىك تۋعان جەرىن گۇلدەندىرۋ ءۇشىن كەتپەن شابۋدىڭ ءوزى باقىت دەپ ويلاعان ازامات تۋعان اۋىلى القابەككە تارتتى.
«ءوزى جاقسى كىسىگە ءبىر كىسىلىك ورىن بار». اينالايىن حالىق ارداگەر ۇلىن ەمىرەنىپ قارسى الدى. قابا اۋدانىنىڭ اكىمى، ءناسىپ قايدار ۇلى ونى القاباكتەگى مالشىلىق 8-وتريادىنا( اۋىل) اكىم ەتىپ تاعايىندادى. «كورە-كورە كوسەم بولادى، سويلەي-سويلەي شەشەن بولادى» دەگەندەي قايناعان قالا ومىرىنە قانىپ، قىتايدىڭ ولكە-قالالارىنىڭ دەنىن ارالاعان سەكەڭ بۇل كۇندە بىلەگى جۋان مىقتى عانا ەمەس، وزىندىك ءبىلىمى، ءومىر تۇسىنىگى، مايدان-تۇرعىسى، وي-پىكىرى بار ىسىلعان جەتەكشى دە ەدى.
«كەڭ بولساڭ كەم بولمايسىڭ» دەگەندەي، ونىڭ قىزمەت ءادىسى شاش ال دەسە باس الاتىن، كۇن بويى ماجىلىسكە قاماپ ۇرەي تۋدىراتىن كۇيگەلەك شولاق-شوشىتىراڭدارعا مۇلدە ۇقسامايتىن. مالشىلارمەن ەتەنە ارالاسىپ، پىشەن شابۋدا، وتاردا بىرگە بولاتىن. مالشى جانىنىڭ سۋىن، جۇمىستىڭ ىعىن تاۋىپ ىستەگەندىكتەن قاشان دا ونىڭ الدى قارىق، ەڭبەگى ءونىمدى بولدى. 1968-جىلى اۋىلدىڭ جىلقى تۇياعى 4 مىڭعا جەتتى.
«ەل ءۇمىتىن ەر اقتار، ەر اتاعىن ەل ساقتار» دەيدى حالقىمىز. اتىشۋلى مادەنيەت توڭكەرىسى كەزىندە كوپشىلىك ورە تۇرەگەلىپ، قورعان بولىپ قادىرلى باسشى، اسىل ازاماتىنا شاڭ جۋىتپادى. جۇدىرىقتاي جۇمىلعان ءبىر دۇيگە ارقا تىرەپ، جان-جاقتان قولداۋعا يە بولعان سەكەڭ تولقىنعا ءتوسىن توسقان جارتاستاي، قايىسپاي جۇمىسىن جۇرگىزە بەردى.
كەيىنگى جىلداردا سەكەڭ تالاي-تالاي يگىلىكتى ىستەرى ارقىلى حالىقتىڭ قۇرمەتىنە يە بولدى. قاجىماس قايرات، مۇقالماس جىگەرىمەن جاساعان ازاماتتىق ەڭبەكتەرى ەل ەسىندە قالدى.
ءبىز اعا بالۋان سەرىك قوجاباي ۇلىنىڭ دەنساۋلىعىنىڭ ەرتەرەك قالپىنا كەلىپ، تاعى دا ەل ورتاسىندا امان-ەسەن ەڭبەك ەتۋىنە تىلەكتەستىك بىلدىرەمىز.
اۆتورى :
سلامحات سەيتقامزا ۇلى