پەتروپاۆلعا جاڭا اكىم تاعايىندالدى

پەتروپاۆل. قازاقپارات - سولتۇستىك قازاقستان وبلىسى اكىمىنىڭ وكىمىمەن سەرىك مۇحامەديەۆ پەتروپاۆل قالاسىنىڭ اكىمى بولىپ تاعايىندالدى.

بۇل جايىندا س ق و اكىمىنىڭ باسپا ءسوز قىزمەتى حابارلادى، دەپ حابارلايدى قازاقپارات ءتىلشىسى.

سەرىك مۇحامەديەۆ 1965 -جىلى شىعىس قازاقستان وبلىسى كوكپەكتى اۋدانى بياعاش اۋىلىندا دۇنيەگە كەلدى. ءبىلىمى جوعارى، 1989 -جىلى ينجەنەر ماماندىعى بويىنشا وسكەمەن قالاسىنىڭ قۇرىلىس-جول ينستيتۋتىن اياقتاعان.

ەڭبەك جولىن 1989 -جىلى الماتى قالاسىنىڭ 2562 اۆتوتىزبەكتى پايدالانۋ ءبولىمىنىڭ باسشىسى بولىپ باستادى. 1991-2010 -جىلدار ارالىعىندا ساۋدا جانە بيزنەس سالالارىندا ەكونوميست، بىرنەشە كومپانيانىڭ ديرەكتورى بولىپ جۇمىس ىستەدى.

مەملەكەتتىك قىزمەتكە 2010 -جىلدىڭ شىلدەسىندە كەلدى. س ق و جولاۋشىلار كولىگى جانە اۆتوموبيلدەر جولدارى باسقارماسىندا جوسپارلاۋ جانە سمەتالىق-شارتتىق جۇمىستاردى جۇرگىزۋ ءبولىمىنىڭ باس مامانى، جولاۋشىلار تاسىمالداۋدى ۇيىمداستىرۋ ءبولىمىنىڭ باستىعى، باسقارما باسشىسىنىڭ ورىنباسارى لاۋازىمدارىندا 2016 -جىلعا دەيىن قىزمەت اتقاردى.

وسى تاعايىنداۋعا دەيىن 2021 -جىلدىڭ قازان ايىنان س ق و عابيت مۇسىرەپوۆ اتىنداعى اۋداننىڭ اكىمى بولىپ قىزمەت ەتتى.