قۇپيا وپەراتسيالارعا قاتىساتىن ۇ ق ك- نىڭ «ا» ارناۋلى ماقساتتاعى قىزمەتى جايلى نە بىلەمىز

استانا. قازاقپارات - وتاندىق جۋرناليستەر ۇلتتىق قاۋىپسىزدىك كوميتەتى «ا» ارناۋلى ماقساتتاعى قىزمەتىنىڭ وقۋ- جاتتىعۋ پوليگونىندا بولىپ، قاۋىپتى ماماندىق يەلەرىنىڭ جۇمىسى مەن دايىندىعى، قىزمەت بارىسىندا قولدانىلاتىن قارۋى مەن زاماناۋي تەحنيكالارىمەن تانىستى، دەپ حابارلايدى قازاقپارات ءتىلشىسى.

ءتۇر- الپەتىن جاسىراتىن، ارنايى وپەراتسيالارى قۇپيا سانالاتىن «ا» قىزمەتىنىڭ ماماندارى وقۋ- جاتتىعۋ جيىنى كەزىندە وزدەرىنىڭ جۇمىس باعىتتارى تۋرالى بۇرىن ايتىلماعان تىڭ مالىمەتتەرىمەن ءبولىستى. اۋىر دا، جاۋاپتى مىندەت ارقالاعان قارۋلى جىگىتتەر نيەتتى جاس ورەندەرگە كەڭەس بەرىپ، ءوز ساپىنا قالاي قوسىلۋعا بولاتىنىن ايتتى.

«ءبىزدىڭ قىزمەتكە ىرىكتەۋ بىرنەشە كەزەڭنەن وتەدى. بىرىنشىدەن، كانديدات قازاقستان رەسپۋبليكاسىنىڭ ازاماتى بولۋى كەرەك. ەكىنشىدەن، ول اسكەري ازامات نەمەسە اسكەري وقۋ ورنىن بىتىرگەن بولۋى ءتيىس. تالاپقا ساي، بۇل قىزمەتكە 23-29 جاس ارالىعىنداعى ۇمىتكەرلەر ىرىكتەلەدى. فيزيكالىق دايىندىعى جوعارى، پسيحولوگيالىق جاعدايى جاقسى بولۋى - باستى قاعيدالاردىڭ ءبىرى. ويتكەنى، ءبىز ارنايى وپەراتسيالارعا قاتىسامىز. سول ساتتەردە سترەسسكە توزىمدىلىك اسا قاجەت»، - دەپ توقتالدى ارناۋلى قىزمەتتىڭ مامانى.

ۇلتتىق قاۋىپسىزدىك كوميتەتىنىڭ «ا» قىزمەتى قاتىساتىن ارنايى وپەراتسيالاردىڭ بارلىعى - قۇپيا. دەگەنمەن ونىڭ قىزمەت باعىتى ايقىن - ول تەرروردىڭ جولىن كەسۋ، الدىن الۋ.

«مۇنداعى ءار قىزمەتكەر باعالى. ءبىزدىڭ قاتارىمىزدا قىزدار دا بار. ولار وزىنە جۇكتەلگەن مىندەتتى ابىرويمەن، جوعارى دەڭگەيدە اتقارىپ ءجۇر. مەن بۇرىن «بۇل قىزمەتكە نەگە تەك وفيتسەرلەردى قابىلدايدى؟»، دەپ ويلاناتىن ەدىم. كەيىن، ياعني 20 جىل وسىندا قىزمەت ىستەپ، تاجىريبەم تولىققان سوڭ ونىڭ جاۋابىن تاپتىم. سەبەبى ءبىزدىڭ قاتارىمىزدا تەك كاسىبي ماماندار بولۋى كەرەك. وسى ورايدا، مىنا ەكى ماسەلەگە توقتالعىم كەلەدى: بىرىنشىدەن، ءبىزدىڭ قولىمىزدا قارۋ بار. ونى اقىل- ويمەن پايدالانباساڭ، قاۋىپ توندىرمەيتىن، جازىقسىز ادامنىڭ ءومىرىن قيۋىڭ مۇمكىن. ەكىنشىدەن، اسكەري ادام رەتىندە قولىڭدا قارۋ بولا تۇرا، ونى جاۋىڭا قارسى قولدانباۋ - ول دا قىلمىس. سوندىقتان ءبىزدىڭ قىزمەتتە تاۋەكەل جوعارى. ال ماماندار ەشكىمگە زيانىن تيگىزبەي، بۇيرىقتى ورىنداۋ ءۇشىن وسى ەكى نازىك ماسەلەنى سانالى ساراپتاي الۋى ءتيىس»، - دەدى «ا» ارناۋلى قىزمەتىنىڭ قاتارىندا 20 جىلدان اسا ەڭبەك ەتىپ كەلە جاتقان قىزمەتكەر.

مامانداردىڭ ايتۋىنشا، اتالعان قىزمەتكە تۇسكىسى كەلەتىن 10 ادامنىڭ تەك بىرەۋى عانا ىرىكتەۋدەن تولىق ءوتىپ جاتادى. ماماندار ءبىر جىلدىڭ 8 ايىندا وقۋ- جاتتىعۋ جيىندارىندا بولىپ، وزدەرىنىڭ بىلىكتىلىگى مەن شەبەرلىگىن شىڭدايدى.

«بۇل جۇمىستاعى قيىن كەزەڭ - ول قاسىڭداعى قارۋلاسىڭنان ايرىلىپ قالۋ. ارناۋلى قىزمەت بولعان سوڭ، قايعىلى جاعدايلار بولادى. سونىمەن قاتار وتكىزىلگەن وپەراتسيادان كەيىنگى جاۋاپكەرشىلىك اۋىر. ءبىز جىگىتتەرمەن جينالىپ، وقيعانى تالقىلايمىز، كىمنىڭ- قالاي ارەكەت ەتكەنىنە باعا بەرەمىز. ناقتى ايتقاندا، وپەراتسيادان كەيىنگى تالداۋ جۇرەدى. بۇل ءبىراز ۋاقىتقا دەيىن جادىڭنان كەتپەيدى»، - دەپ تۇيىندەدى «ا» ارناۋلى ماقساتتاعى قىزمەتىنىڭ مامانى.