تۇرىكمەنستاندا اركاداگ اتالاتىن العاشقى «اقىلدى» قالا اشىلدى - فوتو

اشحاباد. قازاقپارات - بەيسەنبى كۇنى تۇرىكمەنستاندا ەل پرەزيدەنتى سەردار بەردىمۋحامەدوۆتىڭ قاتىسۋىمەن العاشقى «اقىلدى» قالا اركاداگ سالتاناتتى جاعدايدا اشىلدى، دەپ حابارلايدى قازاقپارات «تۇرىكمەنستان بۇگىن» باسىلىمىنا سىلتەمە جاساپ.

اشحابادتان وڭتۇستىك- باتىسقا قاراي 30 شاقىرىم قاشىقتىقتا ورنالاسقان جاڭا قالانىڭ قۇرىلىسى 2019 -جىلى باستالعان بولاتىن. ونىڭ نەگىزىن قالاۋ راسىمىنە حالك ماسلاحاتىنىڭ (پارلامەنتتىڭ جوعارى پالاتاسى) ءتوراعاسى گۋربانگۋلى بەردىمۋحامەدوۆ قاتىستى.

اركاداگ - ەلدەگى العاشقى «اقىلدى» قالا. وندا تەك ەكولوگيالىق تازا كولىكتەر (ەلەكتروبۋستار مەن ەلەكتروموبيلدەر) قاتىنايدى. سونداي-اق قالادا «اقىلدى» تۇراقتار، كۇن باتارەيالارى، جەل گەنەراتورلارى جانە تاعى باسقاسى ورناتىلعان.

اۋماعى 1000 گەكتاردى قۇرايتىن جاڭا شاھاردا 70 مىڭنان استام ادام تۇرادى دەپ جوسپارلانعان.

قۇرىلىستىڭ العاشقى كەزەڭىندە 336 زاماناۋي عيمارات بوي كوتەردى. ۇيلەردىڭ سىرتىنا جىل ماۋسىمىنا قاراي ىشتەگى تەمپەراتۋرانى رەتتەپ وتىراتىن جىلۋ قاپتامالارى قولدانىلعان. بارلىعى 258 تۇرعىن ءۇي سالىندى. ولاردىڭ جانىندا مەكتەپتەر، بالاباقشالار، وزگە دە ءبىلىم مەكەمەلەرى مەن سپورت كەشەندەرى ورنالاسقان.

قازىرگى ۋاقىتتا 6 مەديتسينا مەكەمەسى سالىندى. الداعى ۋاقىتتا اۋرۋحانالاردىڭ جەلىسى قۇرىلاتىن بولادى، وعان انا مەن بالا دەنساۋلىعىن قورعاۋ ورتالىعى دا ەنەدى.

سونىمەن قاتار قالادا 25 اكىمشىلىك عيمارات، 11 مادەني-ساۋىقتىرۋ ورتالىعى بار.