كەنتاۋدا فاست- فۋدتان ۋلانعاندار سانى كوبەيۋى مۇمكىن - دارىگەر

تۇركىستان. قازاقپارات كەنتاۋدا فاست- فۋدتان ۋلانعاندار سانى كوبەيۋى مۇمكىن. بۇل تۋرالى كەنتاۋ قالالىق ورتالىق اۋرۋحاناسىنىڭ باس دارىگەرى اسىلبەك ۋتەبايەۆ مالىمدەدى، دەپ حابارلايدى قازاقپارات ءتىلشىسى.

دارىگەردىڭ ايتۋىنشا، قازىر اۋرۋحاناعا كەلمەي، ۇيلەرىندە ەمدەلىپ جاتقان ناۋقاستار بار. سولاردا الداعى ۋاقىتتا دارىگەرلەردىڭ كومەگىنە جۇگىنۋى مۇمكىن. سول سەبەپتى قالالىق اۋرۋحانانىڭ جۇقپالى اۋرۋلار بولىمشەسىنەن قوسىمشا تاعى 40 ورىن دايىندالدى.

«ناۋقاستار چيكەن، پيتستسا، سۋشي جەگەنىن ايتۋدا. بارلىعى 25-26 - ماۋسىم كۇندەرى كەنتاۋ قالاسىنداعى ءدامحانادان فاست- فۋد ونىمدەرىن جەگەن. ىشىندە تاپسىرىسپەن ۇيلەرىنە الدىرتقاندار دا بار. ولار دەنە قىزۋى جوعارىلاعانىن، قۇسىپ، ءىشىنىڭ وتكەنىن ايتىپ شاعىمدانعان. قازىرگى تاڭدا كەنتاۋ قالالىق اۋرۋحاناسىنىڭ جۇقپالى اۋرۋلار بولىمشەسىنە 67 ناۋقاس جاتقىزىلدى. ونىڭ ىشىندە 40 بالا، 3 جۇكتى ايەل بار. بارلىعىنىڭ جاعدايى ورتاشا دارەجەدەگى اۋىرىلىقتا. 25 ناۋقاس امبۋلاتوريالىق ەم قابىلداپ جاتىر» - دەدى اسىلبەك ۋتەبايەۆ.

دارىگەرلەردىڭ ايتۋىنشا، ەرتەڭنەن باستاپ جاعدايلارى جاقسارعان تۇرعىنداردى اۋرۋحانادان شىعارۋ، ارمەن قاراي امبۋلاتوريالىق ەمگە جىبەرۋ جۇمىستارى جۇرگىزىلمەك.

ايتا كەتەيىك، بۇدان الدىن كەنتاۋدا فاست- فۋدتان ۋلانعاندار سانى 92 گە جەتكەنىن جازعان بولاتىنبىز.