پارلامەنتتىك كانيكۋل كەزىندە جۇمىسىمىز توقتامايدى - سەنات ءتوراعاسى

استانا. قازاقپارات - بۇگىن سەناتتىڭ جالپى وتىرىسىندا پالاتا ءتوراعاسى ماۋلەن اشىمبايەۆ وسى سەسسيانىڭ جۇمىسىن قورىتىندىلادى، دەپ حابارلايدى قازاقپارات ءتىلشىسى.

«بۇگىن سەگىزىنشى شاقىرىلىمداعى پارلامەنتتىڭ ءبىرىنشى سەسسياسى اياسىندا سەناتتىڭ قورىتىندى وتىرىسىن وتكىزدىك. سەسسيا ناۋرىز ايىنىڭ سوڭىندا عانا باستالدى. سوعان قاراماستان، وسى ۋاقىت ىشىندە مەملەكەت باسشىسىنىڭ ەلىمىزدى جاڭعىرتۋعا ارنالعان رەفورمالارىن زاڭنامالىق تۇرعىدان قامتاماسىز ەتۋ ءۇشىن اۋقىمدى جۇمىس اتقارىلدى. ءۇش اي مەرزىمدە پارلامەنت 25 زاڭ قابىلدادى. ولاردىڭ ىشىندە 10 زاڭعا دەپۋتاتتىق كورپۋس باستاماشىل بولدى»، - دەدى م. اشىمبايەۆ.

سەنات سپيكەرى پالاتانىڭ وڭىرلەرمەن ءوزارا ءىس- قيمىلدى نىعايتۋ باعىتىنداعى جۇمىستاردىڭ قورىتىندىسىنا دا توقتالدى. ول سەسسيا بارىسىندا جەرگىلىكتى وكىلدى ورگاندارمەن ءوزارا ءىس- قيمىل جاساۋ جونىندەگى كەڭەستىڭ جانە «ءوڭىر» دەپۋتاتتىق توبىنىڭ قۇرامدارى جاڭارىپ، وتىرىستارى وتكىزىلگەنىن تىلگە تيەك ەتتى.

ماۋلەن اشىمبايەۆتىڭ ايتۋىنشا، وسى سەسسيادا دەپۋتاتتاردىڭ زاڭ شىعارۋ قۇقىعىن ىسكە اسىرۋعا جاردەمدەسەتىن جاڭا تەتىك - سەناتتىڭ جوبالىق كەڭسەسى قۇرىلدى. سەنات جانىنداعى جاس ساراپشىلار كلۋبىنىڭ وتىرىستارى دا تۇراقتى تۇردە وتكىزىلىپ كەلەدى. مەملەكەت باسشىسىنىڭ تاپسىرماسىنا سايكەس، پارلامەنتتە «ءبىر ەل - ءبىر مۇددە» دەپۋتاتتىق توبى جاساقتالىپ، ونىڭ قۇرامىنا قازاقستان حالقى اسسامبلەياسىنان سايلانعان دەپۋتاتتار ەندى. ورنىقتى دامۋ ماقساتتارىنا مونيتورينگ جۇرگىزۋ جونىندەگى پارلامەنتتىك كوميسسيانىڭ العاشقى وتىرىسى وتكىزىلگەنى دە بەلگىلى.

«سەناتتىڭ ماڭىزدى مىندەتتەرىنىڭ ءبىرى - پرەزيدەنتىمىزدىڭ رەفورمالارىن زاڭنامالىق تۇرعىدان ساپالى ءارى ۋاقتىلى قامتاماسىز ەتۋ. ەرتەڭ پالاتالاردىڭ بىرلەسكەن وتىرىسى وتەدى. وندا ءبىرىنشى سەسسيانىڭ جۇمىسىنا قورىتىندى جاسالادى، سودان كەيىن پارلامەنتتىك كانيكۋل باستالادى. پارلامەنتتىك كانيكۋل كەزىندە جۇمىسىمىز توقتامايتىنى بەلگىلى. ءبىزدىڭ پالاتا - وڭىرلەردىڭ مۇددەسىن قورعايتىن نەگىزگى ينستيتۋت. سوندىقتان، وڭىرلەرگە بارعان كەزدە، حالىقپەن بەلسەندى كەزدەسىپ، جەرگىلىكتى جەرلەردەگى وزەكتى ماسەلەلەردى جان- جاقتى ساراپتايسىزدار دەپ ويلامىن»، - دەدى دەدى ماۋلەن اشىمبايەۆ.

ايتا كەتەيىك، 27-ماۋسىم كۇنى ءماجىلىس ءتوراعاسى ەرلان قوشانوۆ VIII سايلانعان ق ر پارلامەنتىنىڭ ءبىرىنشى سەسسياسىنداعى پالاتانىڭ جۇمىسىن قورىتىندىلادى.

ال، 30- ماۋسىمدا پارلامەنت پالاتالارىنىڭ بىرلەسكەن وتىرىسى ءوتىپ، پارلامەنتتىڭ ءبىرىنشى سەسسياسى رەسمي تۇردە جابىلادى.