كولىك تەرەزەسىن سىندىرىپ، قوقان-لوققى كورسەتكەن جۇرگىزۋشى ۇستالدى

استانا. قازاقپارات - الەۋمەتتىك جەلىدە جول بويىندا ەكى جۇرگىزۋشى اراسىندا تۋىنداعان جانجالعا قاتىستى ۆيدەوعا پوليتسيا تۇسىنىك بەردى، دەپ حابارلايدى قازاقپارات.

جولدى بولىسە الماعان كولىكتەردىڭ ءبىرىنىڭ جۇرگىزۋشىسى، ەكىنشى كولىكتىڭ الدىڭعى شىنىسىن تەۋىپ سىندىرادى، كەيىن وڭ جاقتاعى تەرەزەنى جۇدىرىعىمەن شاعىپ، جۇرگىزۋشىگە قوقان- لوقى كورسەتەدى. ۆيدەودا ايەلدىڭ كولىك ىشىندە بالا وتىرعانىن ايتىپ، ايعايلاعان داۋىسى ەستىلەدى.

پوليتسيا مالىمەتىنە سايكەس، ەر ادام ۇستالىپ، تەرگەۋ باستالدى.

«جامبىل اۋدانىنىڭ پوليتسيا قىزمەتكەرلەرى كۇدىكتىنى ۇستادى. ول الماتى قالاسىنىڭ 1993 -جىلى تۋعان ك. ەسىمدى تۇرعىنى بولىپ شىقتى»، پوليتسيا اقپاراتىندا.

2- ماۋسىم كۇنى جامبىل اۋدانىنىڭ پوليتسيا بولىمىنە 1992 -جىلى تۋعان و. ەسىمدى ازامات «الماتى- بىشكەك» اۆتوجولىندا ساعات 19:20 شاماسىندا جول قوزعالىسى ەرەجەلەرىن بۇزىپ، جول- كولىك وقيعاسىن جاساعان، سونىمەن قاتار بۇزاقىلىق نيەتپەن كولىگىن بۇلدىرگەن بەلگىسىز ادامعا قاتىستى شارالار قابىلداۋدى سۇراپ، ارىزبەن جۇگىندى.

«دەرەك ق ر قىلمىستىق كودەكسىنىڭ 293-بابى 1-بولىگىندە كوزدەلگەن قىلمىستىق قۇقىق بۇزۋشىلىق بەلگىلەرى بويىنشا بىردەن اۋداندىق پوليتسيادا تىركەلدى. جابىرلەنۋشىگە سوت- مەديتسينالىق ساراپتاما تاعايىندالدى. كۇدىكتىنىڭ اۆتوماشيناسى ۇزىناعاش اۋىلىنىڭ ارنايى ايىپ تۇراعىنا قويىلدى. جول- كولىك وقيعاسى فاكتىسىمەن ق ر اكىمشىلىك قۇقىقبۇزۋشىلىق تۋرالى كودەكستىڭ 610-بابى 1-بولىگى بويىنشا ك. ەسىمدى جۇرگىزۋشىگە قاتىستى اكىمشىلىك ءىس قوزعالدى»، - دەلىنگەن حابارلامادا.

ءمالىم ەتىلگەندەي، بۇزاقىلىق فاكتىسىمەن تۇپكىلىكتى ءىس جۇرگىزۋ شەشىمىن قابىلداۋ ءۇشىن تەرگەۋ ءىس- شارالارى جۇرگىزىلىپ جاتىر.