بۇگىن - بۇقارالىق اقپارات قۇرالدارى قىزمەتكەرلەرى كۇنى

استانا. قازاقپارات - بۇگىن - بۇقارالىق اقپارات قۇرالدارى قىزمەتكەرلەرىنىڭ ءتول مەرەكەسى. ياعني بۇگىن حالىقتىڭ ءال- اۋقاتى مەن قوعام تىنىسىنان حابار تاراتاتىن تىلشىلەر قاۋىمى كاسىبي مەرەكەسىن اتاپ وتەدى.

جۋرناليستيكا – ب ا ق قۇرالدارىنىڭ (ينتەرنەت، باسپا، راديو، تەلەۆيدەنيە، سايت) كومەگىمەن اقپاراتتى جيناۋ، وڭدەۋ جانە تاراتۋ جۇمىسى. جۋرناليستيكانىڭ عىلىمي ءتارتىبى باسپانىڭ دۇنيەگە كەلۋىمەن تىكەلەي جولعا قويىلعان. ال ⅩⅨ عاسىردىڭ ەكىنشى جارتىسى مەن ⅩⅩ عاسىردىڭ باسىندا فوتو مەن كينوجۋرناليستيكا ومىرگە كەلىپ، سالاعا تىڭ تىنىس اكەلدى. ىزىنشە 1920-1940 -جىلدارى راديو مەن تەلەجۋرناليستيكانىڭ ءداۋىرى باستالدى.

ال ءبىزدىڭ تاريحشىلار جالپى قازاق دالاسىندا جۋرناليستيكانىڭ نەگىزى ⅩⅨ عاسىردىڭ سوڭى مەن ⅩⅩ عاسىردىڭ باسىندا قالانعانىن ايتادى. «تۇركىستان ءۋالاياتىنىڭ گازەتى»، «دالا ءۋالاياتىنىڭ گازەتى»، «كيرگيزسكايا ستەپنايا گازەتا»، «قازاقستان» گازەتى، «ايقاپ» جۋرنالى، «سەركە» گازەتى... جالپىۇلتتىق سيپات پەن سۇرانىسقا يە بولعان «قازاق» گازەتى جارىققا شىققانعا دەيىن اتالعان باسىلىمنىڭ بارلىعى بىردە ۇكىمەت قىسىمىمەن، بىردە قارجى تاپشىلىعىنان جابىلىپ جاتتى. «قازاق جۋرناليستيكاسىنىڭ اتاسى» اتانعان مۇحامەتجان سەراليندەر دە سول تۇستا ەڭبەك ەتكەنىن اتاپ ءوتۋ كەرەك.

ⅩⅩ عاسىردىڭ باسىنداعى باسىلىمداردىڭ ىشىندە الاش زيالىلارى شىعارعان ۇلتتىق يدەيانىڭ شىراقشىسى، ازاتتىق رۋحىنىڭ قوڭىراۋى اتانعان «قازاق» گازەتىنىڭ شوقتىعى بيىك. 1905 -جىلعى «قارقارالى پەتيتسياسىندا» قويعان تالاپتاردىڭ ءبىرى (پەتيتسيانىڭ 3 -تاراۋى) - «قازاق تىلىندە گازەتتەر باسىپ شىعارۋ قاجەتتىگى» بولاتىن. الاش ازاماتتارىنىڭ ماقساتى ورىندالىپ، 1913-1918 -جىلدارى «قازاق» گازەتىنىڭ 265 ءنومىرى جارىققا شىقتى. كەيبىر مالىمەتتەرگە قاراعاندا، «قازاق» گازەتىنىڭ تارالىمى العاشىندا 3 مىڭ دانا بولسا، كەيىننەن ول 8 مىڭ داناعا جەتىپ، ۇلتتىق ميسسيانى ورىنداۋعا ولشەۋسىز ەڭبەك ءسىڭىردى.

2019 -جىلى ۇكىمەتتىڭ ءتيىستى قاۋلىسى جاريالانىپ، 28 -ماۋسىم كۇنى بۇقارالىق اقپارات قۇرالدارى قىزمەتكەرلەرىنىڭ مەرەكەسى اتالىپ وتەتىن بولدى. ونىڭ الدىندا پرەزيدەنت قاسىم- جومارت توقايەۆ جۋرناليستەردىڭ كاسىبي مەرەكەسىن بەكىتۋ جونىندە ۇكىمەتكە تاپسىرما بەرگەن بولاتىن.

اتاپ ايتقاندا، بيىل 27 -ماۋسىم كۇنى مەملەكەت باسشىسى بۇقارالىق اقپارات قۇرالدارى سالاسىنداعى سىيلىقتار مەن گرانتتار تاپسىردى.

«وزدەرىڭىزگە ءمالىم، وسىعان دەيىن مەنىڭ جارلىعىممەن بۇل مەيرام بۇقارالىق اقپارات قۇرالدارى قىزمەتكەرلەرىنىڭ كۇنى بولىپ بەلگىلەندى. وتاندىق مەديا جاڭا كەزەڭگە قادام باستى. قازىر اقپارات تاراتۋ جىلدامدىعى، ونىڭ مازمۇنى، قۇرالى - ءبارى وتە تەز وزگەرىپ جاتىر.

«ءسوز تۇزەلدى، تىڭداۋشى، سەن دە تۇزەل» دەپ حاكىم اباي ايتپاقشى، جۋرناليستىڭ وسى وزگەرىستەرگە بەيىمدەلۋى وتە ماڭىزدى. كەشە عانا ءداستۇرلى جانە جاڭا مەديانىڭ باسەكەسى تۋرالى ءسوز قوزعالۋشى ەدى.

ال بۇگىن سول سايتتاردى الەۋمەتتىك جەلىلەر، مەسسەندجەرلەر، پلاتفورمالار اقپارات الاڭىنان ىعىستىرىپ جاتىر»، - دەدى قاسىم- جومارت توقايەۆ.

پرەزيدەنت اقپاراتتىق قاۋىپسىزدىكتى قامتاماسىز ەتۋ ءۇشىن ۇكىمەت تە، مەديا مەنەدجەرلەر دە وسى وزگەرىستەرگە دايىن بولۋى قاجەت ەكەنىن ايتتى.

«بۇگىندە قازاقستان ورتالىق ازيا ايماعىندا كوشباسشى مەملەكەتكە اينالدى. ءبىز كوپتەگەن سالالار بويىنشا الدا كەلەمىز. ءبىراق توقمەيىلسىپ وتىرۋعا بولمايدى. ءبىز ءبىر ەل بولىپ تاباندى ەڭبەك ەتۋىمىز كەرەك. قازاقستان وزىق ەلدەرمەن قاتار تۇراتىن باسەكەگە قابىلەتتى مەملەكەتكە اينالۋى قاجەت. وسى مىندەتتى جۇزەگە اسىرۋ جولىندا سىزدەردىڭ، ياعني جۋرناليستەردىڭ ءرولى ايرىقشا. مەدياماماندارى حالىققا شىنايى اقپارات بەرىپ، ەلىمىزدەگى احۋالدى ازاماتتارعا جان- جاقتى ءتۇسىندىرىپ وتىرۋى كەرەك. بۇل - اسا ماڭىزدى مىندەت. قازىر وتاندىق اقپارات قۇرالدارىنىڭ حالىقارالىق دەڭگەيدە بەلسەندىلىك تانىتاتىن كەزى كەلدى»، - دەدى قاسىم- جومارت توقايەۆ.

پرەزيدەنت اتالعان مىندەتتى ىسكە اسىرۋ ءۇشىن جاڭا مەديا مەنەدجمەنت، شەتەلدەن اقپارات تاراتاتىن بىلىكتى جۋرناليستەر، تىڭ تەحنولوگيا جانە ساپالى ينفراقۇرىلىم قاجەت ەكەنىن العا تارتتى.

«بۇل - ۋاقىت تالابى. ونى ورىنداۋىمىز شارت. وسى رەتتە الەمدىك مەديا كورپوراتسيالاردىڭ وڭ تاجىريبەسىن ەسكەرگەن ءجون»، - دەدى مەملەكەت باسشىسى.