جەتپىس مىڭ ستۋدەنتكە جاتاقحانادا ورىن جەتىسپەيدى - دەپۋتات

استانا. قازاقپارات - بۇگىن ءماجىلىستىڭ جالپى وتىرىسىندا دەپۋتات ەلنۇر بەيسەنبايەۆ ستۋدەنتتەر جاتاقحانالارىنداعى ورىن تاپشىلىعى ماسەلەسىن كوتەردى، دەپ حابارلايدى قازاقپارات ءتىلشىسى.

«ەلىمىزدە 1 ميلليوننان استام ستۋدەنت ءبىلىم الادى. بۇگىندە ستۋدەنتتەرگە جاتاقحانادا 70 مىڭنان استام ورىن جەتىسپەيدى. ياعني، 70 مىڭ ستۋدەنت پاتەر جاعالاپ، وقۋدى ەمەس، كەرىسىنشە پاتەراقىنىڭ قامىمەن جۇرگەنى انىق. كەيىنگى 3 جىل بويى «امانات» پارتياسى ستۋدەنتتەردىڭ جاتىن ورىن ماسەلەسىن جۇيەلى كوتەرىپ، شەشىپ كەلە جاتىر. جىلدا ەڭ بولماعاندا تاعى 10 مىڭ ستۋدەنتتىڭ جاعدايىن جاقسارتۋ پارتيامىزدىڭ «حالىقپەن بىرگە» باعدارلاماسىندا ارنايى كورسەتىلگەن. ول ءۇشىن ءبىز 2023 -جىلدان باستاپ جاتاقحانا قۇرىلىسى ءۇشىن مەملەكەتتىك تاپسىرىس تولەمىن 1,5 ەسەگە، ال مەگاپوليستەرگە شامامەن 2 ەسەگە كوتەرىپ، اكىمدىكتەن جەر ۋچاسكەسىن قايتارىمسىز بەرۋ ماسەلەسىن دە پىسىقتادىق. ءبىراق، بيىل تاعى دا ماسەلە ۋشىعىپ تۇر. 2023 -جىلدىڭ جوسپارىنا سايكەس 11400 ورىندىق 34 جاتاقحانا ىسكە قوسىلۋى ءتيىس ەدى. الايدا بۇل پروتسەستىڭ وتە باياۋ ءارى ءتيىمسىز شارالاردىڭ اسەرىنەن ورىندالماي قالۋ قاۋپى جوعارى»، - دەدى ە. بەيسەنبايەۆ ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.

ونىڭ ايتۋىنشا، جىل بەل ورتاسىنا جەتسە دە، 6 ايدا 11 مىڭنان استام ورىندى قامتيتىن جاتاقحانالاردىڭ تەك 900 ورىندىق ەكەۋى عانا، ياعني 8 پروتسەنتى عانا ىسكە قوسىلدى.

«ەكىنشىدەن، سول تىزىمدەگى جاتاقحانالاردىڭ 2,2 مىڭ ورنى مۇلدەم سالىنباي قالۋ قاۋپىندە تۇر. ياعني قويىلعان مەجە دە، بەرىلەتىن ستۋدەنتتىك جاتاقحانالاردا سالىنبايدى دەگەن ءسوز. ءدال وسى ماسەلەنى دەپۋتاتتار ءوز قاپەرىنەن جىبەرگەن ەمەس. ۇشىنشىدەن، جەرگىلىكتى اكىمدىكتەر ءالى دە بولسا ستۋدەنتتىك جاتاقحانالاردى سالۋعا مۇددەلى ەمەس ەكەندىكتەرىن ناقتى كورسەتىپ وتىر. ونىڭ ىشىندە، ءبىلىم بەرۋ ۇيىمدارىنا جەر ءبولۋ، عيماراتتاردىڭ نىسانالى ماقساتىن وزگەرتۋ، قاجەتتى قۇجاتتاردى رەتتەۋ بويىنشا جۇمىستاردى بيۋروكراتياعا اينالدىرىپ وتىر. ۇكىمەت تاراپىنان جاتاقحانا سالۋ بويىنشا «قالدىقتى پرينتسيپتى» ۇستانۋ، جاس ستۋدەنتتەرگە جاسالعان ادىلەتسىزدىك دەپ سانايمىن»، - دەدى دەپۋتات.

بۇل تۇرعىدا ول جاتاقحانا ماسەلەسى ۋشىعىپ تۇرعان ايماقتاردىڭ اكىمدىكتەرى مەن ورتالىق مەملەكەتتىك ورگاندار جاعىنان تەز ارادا بىرلەسكەن ناقتى ءىس- قيمىل جوسپارىن بەكىتۋدى ۇسىندى.

ونىڭ پايىمىنشا، ينۆەستورلارمەن بىرگە جۇيەلى جۇمىستى ۇيىمداستىرىپ، الداعى جاز ايلارىندا قۇرىلىس جۇمىستارىنىڭ قارقىنىن كۇشەيتۋ كەرەك.