قۇربان ايتتا تۇركىستان وبلىسى مەشىتتەرىندە كيىز ۇيلەر تىگىلىپ، ايتتىق تاراتىلادى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان وبلىسىنىڭ باس يمامى ەرجان تولەپوۆ مالىمدەدى، دەپ حابارلايدى قازاقپارات ءتىلشىسى.
قۇربان ايت مەرەكەسىنە وراي، اۋدان، قالالارداعى ءىرى مەشىتتەردىڭ اۋلالارىنا كيىز ۇيلەر قۇرىلىپ، جاماعاتقا داستۇرگە ساي ءدام ۇسىنىلادى.
سونداي-اق مۇقتاج وتباسىلارعا جانە كەنتاۋ مەن سارىاعاش قالالارىنداعى مەدرەسە شاكىرتتەرىنە ايتتىق قورجىندار تاراتىلادى.
بۇدان بولەك، اقساقالدار مەن اپالارعا، بالالار ۇيىندەگى بۇلدىرشىندەرگە ايتتىق داستارحانى جايىلىپ، مەرەكەلىك شارا ۇيىمداستىرىلادى.
بالالارعا ايتتىق تاراتىلىپ، ۇلتتىق ويىنداردان جارىس وتەدى.
باسپا ءسوز ءماسليحاتىندا ەرجان تولەپوۆ قۇربان ايت مەرەكەسى جايىندا كەڭ كولەمدى مالىمەت بەرىپ، قۇربان شالۋ ەرەجەسىن ءتۇسىندىردى.
ال، تۇركىستان قالاسىنىڭ باس يمامى مۇحامەدجان جۇمادۋللايەۆ قۇرباندىققا قانداي مال جارامدى ەكەنىن ايتىپ، شارۋالاردى ايت كۇندەرى مال باعاسىن تۇراقتى ۇستاۋعا شاقىردى.
ايتا كەتەيىك، مۇنىڭ الدىندا وڭىردەگى قاساپشىلارمەن ارنايى جيىن ءوتىپ، ولارعا تۇسىندىرمە جۇمىسى جۇرگىزىلگەن بولاتىن.
وندا مالدى شاريعات تالاپتارىنا ساي سويۋ جانە سانيتارلىق تالاپتاردى ساقتاۋ سەكىلدى ماسەلەلەر تالقىلانىپ، ەرەجەلەر تۇسىندىرىلگەن.
سونداي-اق قالا تۇرعىندارى ونلاين رەجيمدە قۇرباندىق شالۋعا مۇمكىندىگى بار.
بۇل باعىتتا قۇربان شالۋ ءراسىمىن قاشىقتان وتكىزۋگە ارنالعان qurban2023.kz سايتى جۇمىس ىستەيدى.