قازاقستان ورگانيكالىق بيداي ەكسپورتتاۋشى ەلدەر اراسىندا ءتورتىنشى ورىندا
زاڭ جوباسىن پارلامەنتىنىڭ دەپۋتاتتارى ورگانيكالىق ءونىم ءوندىرۋ جانە ونىڭ اينالىمى سالاسىنداعى زاڭنامانى جەتىلدىرۋ ءۇشىن ازىرلەدى.
«جاھاندانۋ جاعدايىندا ەلىمىزدە باسەكەلەستىككە بەلسەندى اۋىل شارۋاشىلىعىن قالىپتاستىرۋ ءۇشىن وسى سالاداعى كۇردەلى ماسەلەلەردى شەشۋ ماڭىزدى. الەمدىك تاجىريبە كورسەتىپ وتىرعانداي، ورگانيكالىق اۋىل شارۋاشىلىعىن دامىتۋدىڭ ماڭىزى وتە زور، ويتكەنى ول، پەرسپەكتيۆالىق باعىت جانە دە اگرارلىق سالانىڭ رەنتابەلدىلىگىن، باسەكەگە قابىلەتتىلىگىن ارتتىرۋعا ىقپال ەتەدى. قازىرگى كەزدە ورگانيكالىق ونىمدەردىڭ الەمدىك نارىعى 120,6 ميلليارد ەۋرونى قۇرادى جانە ول بەلسەندى ءوسىپ كەلەدى. كەيىنگى 20 جىلدا ونىڭ كولەمى 7 ەسەگە ءوستى، ياعني سالا الەمدىك ترەندكە اينالىپ وتىر. حالىقارالىق ۇيىمداردىڭ باعالاۋى بويىنشا ورگانيكالىق ءونىم ەكسپورتى بويىنشا قازاقستان 123 ەلدىڭ ىشىندە 9-ورىندا، ورگانيكالىق بيداي ەكسپورتتاۋشى ەلدەر اراسىندا 4-ورىندا، ەۆروپا وداعىنا ورگانيكالىق مايلى زىعىر تۇقىمىن ەكسپورتتاۋ بويىنشا 6-ورىندا»، - دەدى ءا. بەكتايەۆ.
سونىمەن قاتار ول 2015 -جىلى ەلىمىزدە «ورگانيكالىق ونىمدەردى ءوندىرۋ تۋرالى» زاڭى قابىلدانعانىن ەسكە سالدى.
«الايدا بۇل زاڭ، سالا ماماندارى مەن ەكسپەرتتەرىنىڭ پىكىرى بويىنشا وتاندىق ورگانيكالىق ءونىم وندىرۋشىلەردىڭ زاڭدى مۇددەلەرىن تولىق قورعاي الماي وتىر جانە ورگانيكالىق ءوندىرىستى جۇرگىزۋدىڭ حالىقارالىق تاجىريبەسىنە سايكەس كەلمەيدى. وسىعان بايلانىستى، VII شاقىرىلىمنىڭ پارلامەنت دەپۋتاتتارى باستاماسىمەن «ورگانيكالىق ءونىم ءوندىرۋ جانە ونىڭ اينالىمى تۋرالى» (جاڭا رەداكسيا)، «قازاقستان رەسپۋبليكاسىنىڭ زاڭنامالىق اكتىلەرىنە ورگانيكالىق ءونىم ءوندىرۋ جانە ونىڭ اينالىمى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە تولىقتىرۋلار ەنگىزۋ تۋرالى قازاقستان رەسپۋبليكاسى زاڭدارىنىڭ جوبالارى ازىرلەندى. زاڭ جوبالارىنىڭ نەگىزگى ماقساتى - ورگانيكالىق ءونىم ءوندىرۋ سالاسىنداعى زاڭنامانى جەتىلدىرۋ»، - دەدى سەناتور.
اۆتور:
رۋسلان عابباسوۆ