الماتىدا تامىرىنان قۇرىلىس ماتەريالدارى جاسالاتىن شىرىش وسىمدىگى وسەدى
باس بوتانيكالىق باقتىڭ مالىمەتىنشە، شىرىش - ءساندى تىك گۇلشوعىرلارى بار ەڭ ۇلكەن باقشا داقىلدارىنىڭ ءبىرى. «شىرىش» اتاۋى گرەكتىڭ «eremos» ءشول جانە «ura» قۇيرىق سوزدەرىنەن شىققان، بۇل وسىمدىك گۇلشوعىرلارىنىڭ پىشىنىنە بايلانىستى.
شىرىشتى «شيرياش»، «پاتشا بالداعى»، «كلەوپاترا ينەسى»، «بەنگال وتى» دەپ تە اتايدى. «شىرىش (لات. Erémurus) - Xanthorrhoeaceae تۇقىمداسىنىڭ Asphodelaceae تارماعىنا جاتاتىن كوپ جىلدىق شوپتەسىن وسىمدىكتەر تۇقىمداسى. شىرىش تۇرىنە بايلانىستى بيىكتىگى 2,5 م- گە دەيىن جەتۋى مۇمكىن. جاپىراقتارى ۇزىن، جالپاق، ءپىشىنى روزەتكا ءتارىزدى جانە گۇلدەر اشىلعانعا دەيىن سولىپ قالۋى مۇمكىن. تۇعىرداعى قوڭىراۋ ءتارىزدى گۇلدەر سپيرال تۇرىندە ورنالاسقان، بۇل رەتتە ولار سارى، قوڭىر، شاڭدى قىزىل نەمەسە قىزعىلت تۇستەرگە بويالۋى مۇمكىن. گۇلدەر گۇلشوعىرىنىڭ تۇبىنەن اشىلا باستايدى، ولاردىڭ ءارقايسىسى گۇلدەگەن سوڭ، شامامەن 24 ساعاتتان كەيىن سولىپ قالادى. گۇلدەنۋ ۇزاقتىعى ءار تۇرگە قاراي وزگەرەدى. ورتاشا ۇزاقتىعى - 10 كۇننەن 40 كۇنگە دەيىن. جەمىسى - ءۇش جاسۋشالى، جارتىلاي جالاڭاشتانعان نەمەسە سفەرالىق ءپىشىندى قابىقشالى كاپسۋلا سەكىلدى بولادى، ول پىسكەن كەزدە جارىلىپ كەتەدى»، - دەپ حابارلادى بوتانيكالىق باقتىڭ باسپا ءسوز قىزمەتى.
شىرىشتىڭ تامىرىنان تەحنيكالىق جەلىم، ال كەپتىرىلگەن جانە ۇنتاقتالعان تامىرلاردان پلاستىر جاسالادى. ەگەر تامىرلارى قايناتىلسا، ولاردى جەۋگە بولادى، ءدامى سپارجاعا ۇقساس. شىرىشتىڭ كەيبىر تۇرلەرى تاعامدىق جانە بوياعىش وسىمدىكتەر رەتىندە پايدالانىلادى. ولار ءجۇن مەن جىبەكتى قىزعىلت، سارى جانە ءزايتۇن تۇستەرىنە بويايدى. باس بوتانيكالىق باقتا شىرىشتار «الپيناري» كوللەكسيالىق جانە دارىلىك وسىمدىكتەر ايماعىندا وسەدى.