ايت نامازدان بۇرىن شالىنعان قۇرباندىق قابىل بولا ما

استانا. قازاقپارات - قۇربان شالۋعا نيەتتى مۇسىلمان قاۋىمعا قويىلاتىن ارنايى تالاپتار بار. ونىمەن قازاقستان مۇسىلماندارى ءدىني باسقارماسى ۋاعىز-ناسيحات ءبولىمىنىڭ مەڭگەرۋشىسى باۋىرجان مانسۇروۆ تانىستىردى، دەپ حابارلايدى قازاقپارات ءتىلشىسى.

«قۇربان شالۋ ءۋاجىپ بولۋ ءۇشىن مىنا شارتتار ساقتالۋى قاجەت. قۇربان شالاتىن ادامنىڭ اقىل-ەسى ءبۇتىن بولۋى، باليعات شاعىنا تولعان، مۇسىلمان بولۋ، قۇربان ايت ۋاقىتىندا جولاۋشى بولماۋى كەرەك. سونىمەن قاتار نەگىزگى قاجەتتىلىكتەن تىس نيساپ مولشەرىندەگى قارجىعا يە بولۋ. نيساپ مولشەرى - 85 گرام التىن ياعني قۇنىنا تەڭ كەلەتىن اقشا. زەكەت عيباداتى سياقتى قۇرباننىڭ ءۋاجىپ بولۋى ءۇشىن نيساپ مولشەرىنە جەتكەن مالعا ءبىر جىل تولۋى شارت ەمەس. قۇربان شالعان ۋاقىتتا مىندەتتى تۇردە نيەت ەتۋ كەرەك. ويتكەنى، مال قۇلشىلىق ماقساتىندا سويىلادى. ال نيساپ مولشەرىندە ارتىق قاراجاتى بولماسا دا كەدەي مۇسىلماننىڭ قۇربان شالۋىنا بولادى. شالعان قۇرباندىعى ءناپىل قۇربان ۇكىمىندە بولادى»، - دەدى باۋىرجان مانسۇروۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سونداي-اق، مامان قۇربان شالۋدىڭ ۋاقىتىنا اسا ءمان بەرۋ كەرەكتىگىن ەسكەرتتى.

«قۇربان شالۋدىڭ ۋاقىتىنا كەلسەك، وعان مۇقيات بولۋىمىز كەرەك. قۇربان شالۋدىڭ ۋاقىتى قۇربان ايتتىڭ ءبىرىنشى كۇنى ايت نامازىنان كەيىن باستالىپ، ايتتىڭ ءۇشىنشى كۇنى اقشام نامازىنا از ۋاقىت قالعانعا دەيىن جالعاسادى. قانداي دا ءبىر ماڭىزدى شاريعي سەبەپكە بايلانىستى قۇربان ايت نامازىنا بارا الماي، ايت نامازىن وقىماعان كىسى ناماز وقىپ بولاتىنداي ۋاقىت وتكەننەن كەيىن قۇربانىن شالا بەرۋىنە بولادى. ايت نامازدان بۇرىن شالىنعان مال قۇرباندىق بولىپ ەسەپتەلمەيدى»، - دەپ ءتۇسىندىردى ول.