ح و ك حالىقارالىق بوكس قاۋىمداستىعىن مويىنداۋدان باس تارتتى
مۇنداي شەشىم قابىلداۋعا 69 سايلاۋشى داۋىس بەرگەن. ونىڭ بىرەۋى عانا بۇل شەشىمگە قارسى بولىپ، تاعى 10 سايلاۋشى قالىس قالدى، دەپ حابارلايدى قازاقپارات DW- گە سىلتەمە جاساپ.
2019 -جىلى ح و ك بوكس قاۋىمداستىعىنداعى قارجىلىق جانە باسقارۋ داعدارىسىنا بايلانىستى IBA- نى مويىنداۋدان ۋاقىتشا باس تارتقان. ودان رەفورما جۇرگىزۋدى تالاپ ەتىپ، 2021 -جىلى توكيودا وتەتىن وليمپيادادا بوكستان تۋرنير ۇيىمداستىرۋدان شەتتەتتى. سونداي-اق IBA-عا بوكستان 2024 -جىلعى پاريج جانە 2028 -جىلى وتەتىن لوس-اندجەلەس وليمپياداسى تۋرنيرلەرىن ۇيىمداستىرۋعا رۇقسات ەتىلمەيدى. حالىقارالىق بوكس قاۋىمداستىعىنىڭ مىندەتىن ازىرگە ح و ك اتقارادى.
ح و ك باس ديرەكتورى كريستوف دە كەپپەردىڭ ايتۋىنشا، قاۋىمداستىق وزىنە قويىلعان تالاپتاردى ورىنداماعاندىقتان، IBA- نى مويىنداۋدان باس تارتۋ تۋرالى شەشىم قابىلدانعان. ال IBA بۇعان جاۋاپ رەتىندە «ح و ك ۇلكەن قاتەلىك جىبەردى» دەپ مالىمدەدى.
«بۇگىنگى شەشىم الەمدىك بوكس ءۇشىن قاۋىپتى ەكەنىن جانە ح و ك-تىڭ بۇل ءىسى بوكس پەن سپورتشىلاردىڭ مۇددەسىنە ساي ارەكەت ەتەدى دەگەن مالىمدەمەسىنە اشىق تۇردە قايشى كەلەتىنىن جاسىرا المايمىز»، - دەلىنگەن حابارلامادا.
2020 -جىلدىڭ سوڭىنان باستاپ IBA-نى رەسەيلىك ۋمار كرەمليەۆ باسقارادى. قاۋىمداستىق رەسەي مەن بەلارۋس سپورتشىلارىن ءوز قامقورلىعىمەن وتەتىن جارىستارعا قاتىسۋ مۇمكىندىگىنەن ايىرا قويعان جوق. بۇعان جاۋاپ رەتىندە بىرنەشە شتاتتىڭ، اتاپ ايتقاندا ا ق ش، گەرمانيا جانە ۇلى بريتانيانىڭ ۇلتتىق بوكس فەدەراتسيالارى IBA-دان شىعىپ، وزدەرىنىڭ World Boxing اتتى حالىقارالىق قاۋىمداستىعىن قۇردى.